Nuuk
Unititsineq: Ilinniartitaaneq pillugu pilersaarut soqutigineqanngitsoq
Ilinniartitaanermi periusissiaq Ilinniartitaanermullu pilersaarut II ataatsimiissutigineqarnissaat taamaatiinnarneqarpoq peqataaniarlutik nalunaartut ikittuinnaat nalunaarsimammata
Ataatsimiititsinissaq taamaatinneqartoq.
Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen tusagassiutinut nalunaaruteqarpoq.
Ilinniartitaanermi periusissiaq Ilinniartitaanermullu pilersaarut II pillugit oqallinneq ullumi tallimanngornermi ataatsimiissutigineqartussaagaluartoq unitsiinnarneqarpoq.
Nick Nielsen nunatsinni sumiiffinni assigiinngitsuni innuttaasunik ataatsimiititsisarnertigut ukiortaap kingorna Ilinniartitaanermut periusissiamik – anguniakkanik siunnerfiusunillu saqqummiussisarsimavoq.
Pilersaarutaasut naapertorlugit innuttaasunik ataatsimiititsisaqattaarnerit ilassuserlugit apriilip 25-ianni 2014 ataatsimiititsisoqartussaagaluarpoq, periusissiamik pilersaarutinillu soqutigisaqartut assigiinngitsut 40-it missaanniittut qaaqquneqartut akornanni oqalliffiusussamik.
Ataatsimiititsinissamulli tassunga ulluliunneqartumi peqataaniarlutik nalunaartut ikittuinnaasimammata, - qaaqquneqartuniit pingasuinnaat peqataaniarlutik nalunaarsimapput, - Naalakkersuisoq aalajangerpoq ataatsimiititsinissaq taamaatinneqassasoq.
Ilinniartitaanermi periusissiaq Ilinniartitaanermullu pilersaarut II naatsorsuutigineqarpoq qanittukkut Inatsisartut maanna ataatsimiinneranni ilaasortanut agguaanneqassasut.