Piniarneq
Unioqqutitsilluni tuttunniartoqarpoq
Aalisarnermut, Piniarnermut Nunalerinermullu Naalakkersuisoqarfik nalunaaruteqarpoq sunngiffimmi piniartartut ingerlatsivinni marlunni tallimanik amerlanerusunik tuttuttarsimasut
Unioqqutitsilluni tuttunniartoqarpoq, inuit piniarnermut allagaqartaqanngitsut akuersissuteqanngitsulluunniit tuttunniartarsimallutik.Sunngiffimmilu piniartartut ingerlatsivinni Akia-Maniitsoq Ameralimmilu pisarineqarsinnaasunit tallimanit amerlanerusunik pisaqartarsimapput.
Tusagassiorfinnut nalunaarutikkut Aalisarnermut, Piniarnermut Nunalerinermullu Naalakkersuisoqarfik allappoq.
Politiit suleqatigalugit
– Unioqqutitsilluni piniarnerit piniarnermik nakkutilliisunut ingerlateqqinneqartarput, taakkualu politiit suleqatigalugit pisut tamakkua iliuuseqarfigisarpaat, naalakkersuisoqarfik nalunaarpoq.
Ukioq manna Nuup ingerlatsiviani killilersuisoqalersimavoq, taamaasilluni sunngiffimmi piniartartut nunap immikkoortuanut 3-mut, Akia-Maniitsumut akuersissummik ataatsimik, nunallu immikkoortuanut 4-mut, Ameralimmut, akuersissummik aamma ataatsimik tunineqarlutik.
Akuersissutit tamarmik tuttunik tallimanik pisaqarsinnaatitsipput.
Ukioq manna sunngiffimmi piniartartut tuttunniarnerat nunap immikkoortuini amerlanerpaani septembarip 30-anni naavoq, inuussutissarsiutigalugulu piniartut oktobarip 15-iat ilanngullugu tuttunniarsinnaapput.