Unioqqutitsilluni sulisartunik nunanit allamiunik atuisorsimasoq

- Oqartussaasut akisussaasuusut maanna suliamut akuliutsinneqareerput, taakkulu tamanna pillugu inatsit naapertorlugu aammalu entreprenøri suleqatigalugu entreprenørimut kinguneqartitsisoqassanersoq paasiniaaffigissavaat naliliiffigissallugulu.

Namminersorlutik Oqartussat tusagassiutinut nalunaaruteqarpoq.

Nuummi Qapiarfiusaami aneersuartarfinnik iluarsaassinermut atatillugu suliassat suliarineqarnerini entreprenøri inatsisinik unioqqutitsilluni sulisartunik nunanit allamiunik atuisimasoq tassani paasineqarpoq.

Entreprenøri tamanna pillugu iliuuseqareermat, taamaalillunilu sulisartut pineqartut suliassami tassani – imaluunniit Kalaallit Nunaanni suliassani allani – sulisorineqarunnaareermata ilisimatitsissutigineqarpoq.

- Ineqarnermut Attaveqaqatigiinnermullu Naalakkersuisoqarfiup, ulluni tulliuttuni suliassami tassani sanatitsisutut tamanna entreprenørimut isumaqatigiissummut sunniuteqassanersoq kiisalu suliassamut piffissamut pilersaarummut sunniuteqarsinnaanersoq misissuiffigissavaa. Taamatuttaaq Naalakkersuisoqafiup allannguutaasinnaasut tamaasa pillugit A/S Inissiaatileqatigiiffik INI suleqatigalugu najugaqartunut tamanut paasissutissiisarnissaq qulakkiissavaa, Namminersorlutik Oqartussat allapput.

Ineqarnermut Attaveqaqatigiinnermullu Naalakkersuisoqarfimmit pissutsit matuma siuliani taakkartorneqartut ajuusaarutigimmagit, kisiannili tamatuma peqatigisaanik oqartussaasut akisussaasut suliamik isumaginnilernerat naammagisimaarlugu.