Thursday, November 9, 2017 - 06:53

Unioqqutitsilluni 19-inik tuttuttoq

Assi.: Sermitsiaq.AG
Unioqqutitsillutik piniartartut akioruminaannerat kommunip kipiluttunartippaa

Qeqqata Kommuniani ilaatigut Kangerlussuup, Qaqqatoqqap Isortuarsuullu Tasiata eqqaani ATV-it atorlugit tuttunik umimmannillu piniarneq ajornartorsiutaavoq. AG aviisi taama allappoq.

Unioqqutitsilluni piniarneq

Unioqqutitsilluni piniariaaseq sammineqalersimasoq Siumumit Frederik Olsenip suliaq kommunalbestyrelsemi qaqereeraalu. 

Taamaattumik aqutsiveqarfimmit ajornartorsiutip annertussusaa misissorneqarpoq, atortussanillu kommunalbestyrelsep atorfilittanit pissarsiaanni ilaatigut takuneqarsinnaavoq unioqqutitsilluni piniarneq qaqutikkut pillaanermik kinguneqartartoq. 

Najukkami piniarnermik nakkutilliisoq qamutinik arsaarinninnissaminut akiliisitsinissaminulluunniit pisinnaatitaanngilaq, taamaallaat sakkut pisallu arsaarinnissutigisinnaallugit, tamannalu taamaallaat piniartup akuersineratigut pisinnaalluni, naalakkersuinermik sulialinnut atortussani uparuarneqarpoq. 

Kinguneqartitsisannginneq

Tassani aamma pisoq aalajangersimasoq allaaserineqarpoq, tassani unioqqutitsinermut kinguneqartitsisinnaannginnermut kipiluttunartorsiorneq annertulluni: 

- Kangerlussuup avannaani unioqqutitsilluni 19-inik tuttunneq piniarnermut nakkutilliisup oqaluttuaraa. Qamuteralaat atorneqarsimapput. Piniartup pisuunini politiinut nassuerutigaa, piniarnermilli nakkutilliisut aalajangiisoqarsimaneranik pillaasoqarsimaneranillu ilisimasaqanngillat. Piniarnermut nakkutilliisup inuiaqatigiillu suliamut misigisaa tassaavoq oqaatilleereernerup kingorna susoqarsimanngitsoq, piniartullu pisuunini nassuerutigereersimagaa. Suliap taassuma takutippaa inatsisitigut kinguneqartitsiniarneq ajornakusoortupilussuusoq. 

Unioqqutitsilluni piniarnerup ajornartorsiutaanera pillugu allaaserisaq sapaatip-akunnerani AG aviisimi saqqummertumi tamakkerlugu atuaruk, aviisi digitaliusoq uani pisiarisinnaavat:

Seneste nyheder / Nutaarsiassat kingulliit