ilinniartitaaneq
Ungasianit atuartitsineq iluatsilluartoq
Peqqissaanermik Ilisimatusarfimmi atuartitsissummi anatomimi fysiologiimilu naammassinni artut procentiat qaffasippoq. Taamaapporlu naak ilinniartitsisoq 3.000 kilometerinik ungasissusilimmiikkaluartoq
Peqqissaasunngorniat semesterit sisamaanni atuartitsissummik anatomimik fysiologiimillu taaguutilimmik ilinniagaqarput. Atuartitsissut 2015-imi ukiakkumiilli qarasaasiakkut attaveqaatit aqqutigalugit ingerlanneqalersimavoq, tamatumanilu ilinniartut Nuummiittut ilinniartitsisoq Danmarkimiilluni. Tamatumunnga pissutaasoq tassaavoq piffissami sivisunerusumi sulisussanik pissarsiniarnerup ajornakusoortuunera. Atuartitsinerup sivikillinneqarnissaanut taarsiullugu piffissami sivisunerusumi qarasaasiakkut attaveqaatitigut ilinniartitsineq atorniarlugu toqqarneqarpoq. Tamannalu atorsinnaassuseqarluarpoq. Ilinniartitsisup ilinniartullu imminnut ungasikkaluartut atuartitsissummik naammassinnittartut procentiat qaffasissimavoq.
Atuaruk: Kalaallit Nunaanni atorfittaarnissaq ajornakusoortoq
– Ilinniartut tamarmik 2016-imi angusipput. 2017-imut maannakkorpiaq misilitsinnerit ingerlanneqarput, ingerlalluartoqarpasipporli. Ilinniartunit atuartitsinerup ingerlanera nalinginnaasumik ajunngitsumik naliliiffigisimavaat. Soorunami inimi ilinniartitsisoqarusunnerusimagaluarput. Aaqqissuussineq ingerlaavartumik naleqqussartarput, ilinniartunut ajunnginnerpaamik naleqquttunngorlugu. Ilinniartitsisoq aallartinnermi semesterillu naanerani Nuummiittarpoq. Tamatuma saniatigut atuartitseriaatsinik ineriartortitsiuarpugut, Nabil Karas, atuartitsissummi ilinniartitsisuusoq, oqaluttuarpoq.
Aviisip Sermitsiap ilinniarneq pillugu immikut sammisaani allaaserisaq atuarneqarsinnaavoq. Akeqanngitsumik uani pisinnaavat