Upernavik
Unammillertuerummat tulaanneqartartut akii appartinneqartut
Sulisitsisut Kattuffiata Upernavik Seafoodip akinik appaanera isornartorsiorpaa
Upernavik Seafoodip allagarsiisarfiani atuarneqarsinnaavoq qalerallit tulaanneqartartut akii apparteqqinneqarsimasut ataasinngornermiit. Tamanna pivoq umiarsuaq tunitsiviusoq aalisakkerivimmut unammillertaasup aallareerneratigut, taamaasilluni Upernavik Seafood kisermaassisunngoqqilluni.
Qaleralinnik tunitsivinni Upernavimmi unammilleqatigiittoqaraluarpoq, tassani Suluk Fish Aps aamma Halibut Greenland umiarsuarnik tunitsivinnik tulaassinissamut akuerineqarmata.
Suluk Fish Aps-ip tunitsivini Uummannamut nuuppaa, tassani aamma tunitsiveqarnissamut akuersissuteqarput.
Taamaattumik Upernavik Seafoodip siornatigut akigitinneqartut uterteqqippai, aalisartunut agguaqatigiisillugu kilomut 15 koruunit akigitinneqaqqilerlutik.
Aalisartut annaasaqartut
- Upernavimmi unammilleqatigiittoqarunnaarpoq, taamaattumik aalajangerpugut siornatigut akigitinneqarsimasut aggustip aqqarngani atuutileqqissasut, Upernavik Seafoodimi pisortaq Flemming Andersen Upernaviup allagarsiisarfiani nivingasumi oqarpoq.
Nunaqavissut Suliffiutillit Kattuffiata taamatut aalajangerneq isumaqatiginngilaa, aalisartunut eqquisussaanera isornartorsiorneqarluni.
- Taamatut aalajangiisoqarneratigut aalisartut aningaasatigut eqqorneqarput unammilleqatigiittoqannginnera pissutaalluni, Nusukap siulittaasua Gert Lynge tusagassiutinut nalunaarummi oqarpoq.
Upernavimmi aalisartunut kaammattuuteqarpoq.
- Ukiorpassuarni Upernavik Seafood A/S aalisartut pissarsiassaraluanik aningaasatigut nukittuunngorsimavoq imaaliallaannarlu tamanna allangortinneqarsinnaanani, atsaat aalisartut unammilleqatigiinnerup ingerlaanarnisaa qulakkeersinnaappassuk iluatsittumik ingerlasinnaavoq, Gert Lynge oqarpoq.
Upernaviup allagarsiiviani allassimasoq ataani atuaruk