Nuup Kangerlua
Umimmaat kisinnissaannut ikiortissarsiorpoq
Nuup Kangerluani eqqaanilu umimmannik arlaleriarluni takunnittoqartarsimavoq. Maanna Aalisarnermut Piniarnermullu Naalakkersuisoqarfiup amerlassusaat paasiniarpaa
Nuup Kangerluani tuttunniarnermut augustip aallaqqaataaniit ingerlasussamut atatillugu Nuup Kangerluani umimmaat eqqissisimatitaalluinnarnerat Aalisarnermut Piniarnermut Nunalerinermullu Naalakkersuisoqarfimmiit nalunaarutigineqarpoq.
Nuup Kangerluani umimmannik misissuineq naalakkersuisoqarfiup aallartereersimavaa.
Tuttunniarnermi umimmaat takuneqartut taamaalillutik piniaqqusaanngillat allatigulluunniit akornusersorneqaqqusaanatik, taarsiullugulu umimmaat sumi, qanga qanorlu amerlatigisut takuneqartut nalunaarutigisaqquneqarpoq.
Umimmannik takunnikkuit tamanna Aalisarnermut Piniarnermullu Naalakkersuisoqarfimmut nalunaarutigissavaat. Taamaasiorsinnaavutit telefon 34 53 45 imaluunniit e-mail numl@nanoq.gl atorlugit.
Umimmaat taamatut nalunaarutigineqartut umimmanik misissuinermut umimmaallu pillugit pilersaarusiornermut ilanngunneqarumaarput.
Nuup Kangerluani tuttunniarnermi umimmanik inatsisinik unioqqutitsilluni pisaqartoqarsimaneranik imaluunniit umimmanniartoqarsimaneranik ilisimasaqaraanni paasisaqaraanniluunniit tamannattaaq naalakkersuisoqarfimmut nalunaarutigineqaqquneqarpoq.
Maannakkorpiaq ilisimaneqanngilaq Kalaallit Nunaanni umimmaat qanoq amerlatiginersut. Taamaallaat Ivittuut eqqaanni paasissutissanik katersuisoqarsimavoq.