Ilulissat

Umiatsiarlutik ajunaartut: Angallammik aquttumut ujaasineq taamaatinneqarpoq

Gustav Olsenimut ilaqutaasut ujaasiunnaartoqarnera pillugu kalerrinneqarsimasut nalunaarutigineqarpoq

Umiatsiamik aquttumik Gustav Olsenimut ujaarlernertik taamaatillugu politiit tusagassiutinut nalunaaruteqarput. Gustav Olsen marlunngornerup unnukkuani kingullermik takuneqarpoq. Ilulissat avannaanni Appat eqqaanni marlunngormat ajunaartoqarmat umiatsiami aquttuuvoq, ikinnerpaamik sisamat tassani ajunaarput.

Gustav Olsen angallataalu Nord Star 26 marlunngornermi, pingasunngornermi sisamanngornermilu ujaasisoqarpoq angusaqarfiunngitsumik.

- Politiit marlunngormalli annertuumik ujaarlerput. Qulimiguulimmik, timmisartumik, umiatsianillu immami nunamilu ujaarlertoqarpoq. Tassani umiatsiamik aquttoq umiatsiarlu ujaarineqarput, angusaqarfiunngitsumik. Annertuumik ujaasisoqareersoq politiinit nalilerneqarpoq ujaasineq ingerlatinneqaqqissanngitsoq, politimestereqarfimmi unnerluussisuuneq Lars Kirkegaard nalunaarpoq.

Ujaasineq taamaatinneqarsimasoq ilaqutaasunut nalunaarutigineqareersoq Lars Kirkegaard ilisimatitsivoq.

Umiatsiap sumiissimasinnaaneranik imaluunniit Gustav Olsenip sumiinneranik innuttaasut nalunngisaqarpata qinnuigineqarput Ilulissat politiivinut saaffiginneqqullugit.

Ajunaartut timaat Appani nassaarineqarput. Ajunaartut aappariiupput marluk, Fredericiameersut Aarhusimeersullu. Ilulissani politiit Aasiaat Radioanit marlunngornermi nalunaaqutaq 20.21 Gustav Olsenimit nalunaarfigineqarput. Gustav Olsen ajunaalernermik nalunaarummik kalerrisaarivoq. Politiit erngerlutik ujaasineq aallartippaat. Qulimiguulimmik, angallatinik umiatsianillu ujaasisoqarluni.

Powered by Labrador CMS