Nuuk
Umiatsianut tilliarnartarnermut suliat isertuunneqarput
Illoqarfiit pingaanersaanni umiatsialivimmi sapaatit akunnerisa naanerini umiatsianut tillinniartoqakkajunnerusarpoq.
Nuummi umiatsianut tillinniartoqartarnera suli ajornartorsiutigineqarpoq, tassani nerisassat, sodavandit, aallaasit benziinallu tillinneqakkajuttarlutik.
- Ukioq manna tillinniartarnerit ukioq kingullermut sanilliukkaanni ikinnerulaarput, kisianni tamanna suli ajornartorsiutaavoq. Ingammik sapaatit akunnerisa naaneranni unnukkut tillinniarsimasunik nalunaarutiginnittoqartarpoq, umiatsiaatillillu tillinniarfigitissimasut politiinut nalunaarutiginneqqullugit kaammattortarpagut, Godthåb Bådforeningimi havnemesteri Poul Krohn Sermitsiaq.AG-mut oqaluttuarpoq.
Tillinniat inuusuttut
- Inuusuttut 15-it 16-illut akoranni ukiullit umiatsianut tillinniartartuusut nakkutilliinermut assiliissutini takusinnaasarpagut, taanna paasissutissiivoq.
Umiatsiaatillit peqatigiffia tillinniartarnerit akiorniarlugit iliuuseqassamaarpoq.
- Kisianni suliamut pilersaarusiarput oqaatigisinnaanngilara, Poul Krohn oqarpoq.
Suliat ikinnerit
Umiatsianut tillinniartarnerit suli ajornartorsiutigineqartut, politiit uppernarsarpaat.
- Tillinniarnerit qanoq amerlatiginersut kisitsisaatiginngilagut, kisianni oqaatigisinnaavara ukioq manna tillinniarnerit ukiup siulianut sanilliukkaanni ikinnerulersimapput, sillimasut pisortaat Katrine Sandgreen oqarpoq.
Unnukkut tillinniarnerit
Taarsinerani tillinniarnerit pilernerusartut, taassuma oqaatigaa.
- Ukioq kingulleq ajornartorsiut annertuneroqaaq, tassani umiatsiaatilli tillinniartoqarsinnaaneranut eqqumaffigeqqullugu paasitittariaqarsimallutigit, Katrine Sandgreen erseqqissaavoq.
Politiit massakkut umiatsiliviit eqqaani nakkutilliinerulersimasut, taassuma oqaatigaa.
- Ukioq manna tillinniarnerit ikilisimanerinut tamanna pissutaasinnaavoq. Nalunaarutiginninnerit amerlaneruleraangata nakkutilliinerulertarpugut, sillimasut pisortaat oqarpoq.