Umiatsianik umiatsiaaqqanillu angalaneq isumannaannerusoq

Sineriassuatsinni angallateeqanik umiatsiaaqanillu angallanneq isumannaaneroqqullugu Atassutip Inatsisartunut qineqqusaarutigaa kangerluit imminnut qanittut piuminartullu ikerasaliornikkut imminnut attaveqalersinnaanerat. Taamatut partiip siulittaasorisimasaa Gerhardt Petersen tusagassiorfinnut nalunaarutikkut allappoq.

– Atassummiit isumaqarpugut sumiiffiit ilaanni ikerasalioriaannaat aallartinneqarsinnaasut aallartittariaqartut soorlu Nanortallip kujataaniitoq Itilliatsiaq/Itilleq – taamaalilluni nunatta kujaterpiaani isumannaanerusumik angalasoqarsinnaaqullugu, pingaartumik ukiaanerani ukiullullu, minnerunngitsumillu sikorsuit nalaanni. Naluneqanngilarmi pingaartumik ukiaanerani ukiukkullu aqqut Nanortalik-miit kujammut Narsarmiinut Aapilattumullu imaanaangitsuusoq, aammalu ajoraluaqisumik ajutoortoqartartoq, Gerhardt Petersen tikkuaavoq.

Taamatuttaaq ikerasaliornissaq pisariaqarluinnarpoq Itilliartaat-tigut, tassa nunaqarfiup Eqalugaarsuit kujataaniitoq – angallateeqat umiatsiaaqat Qaqortumiit Aalluitsup Paanut Nanortalimmullu ingerlaartut isumannaanerusumik ingerlasinnaaqullugit, taanna naliliivoq.

Atassutip ilanngullugu qineqqusaarutigaa Torsukattami ikerasak, Narsap kitaaniitoq Ikersuarmi, taavalu Nyboes kanalip Qassimiut avannaaniittup silissisarneqarnissaat taamatuttaarlu itisilerneqarnissaat sulissutigineqassasoq, Gerhardt Petersen paasissutissiivoq.

Atassutip siunnersuutigaa ikerasaliornissat anguniagalimmik piviusunngortinniarnissaannut Kommune Kujalleq suleqatigineqassasoq.

– Qularnanngilluinnarpoq suliap ingerlanerani suliffissaaleqinermut ikilisaataassasoq, ilanngullugu siunnersuutigissavarput sanaartornermi ilinniarfimmi ilinniartuusut qaartiterinermik aatsitassarsiornermillu ilinniagaqartut ilinniutigalugu peqataalluarsinnaanerat, Gerhardt Petersen oqarpoq.

Gerhardt Petersen

Atassut sinnerlugu Inatsisartunut qinigassanngortittoq.