Umiatsiamik ikuallattoqarnerani inuit sisamat annaanneqartut

Aasiaat kujataanni Nassuttuumi tuttunniartut umiatsiaat ikuallaleriasaarmat ilaasut sisamaasut tamarmik immamut pissipput. Ilaasut marluk uutiterput, ataaseq annertuumik uutiterpoq, inuunerminilli ulorianartorsiunngilaq.

Ilaqutariit ikinngummillu ataatsimik ilaasulik umiatsip iluaniipput, taakku aqqaneq marlunnit 55-t tungaannut ukioqarput.

Umiatsiaq ataasinngormat ikuallalersimasoq Aasianni politiinit nalunaarutigineqarpoq.

Umiatsiaq politiinit 22 fodseqassangatinneqarpoq, kisaqqaneranilu dunkimik orserneqarluni. Orsiissutip aalaa aquttarfimmut appakaassimavoq, tassani aamma petroliutortoq ikumalluni. Umiatsiaq ikuallaleriasaarpoq siaruaallunilu, ilaasullu sisamaasut imminnut annaakkumallutik immamut pissillutik, Aasiaat politiivisa pisortaat Arne Sandgreen Reimer oqarpoq.

Angallammit annaanneqartut
Nassuttuumi ataasinngormat pujornera pissutaalluni umiatsiap ikuallattup putsua takuneqarsinnaasimanngilaq.

Annaassiniaatit tamarmik umiatsiamiimmata sisamaallutik nunamut nalupput, sivisuumillu pisoreerlutik annaanneqarlutik.

Qujanartumik umiatsiamik sanioqquttut inuit taakku pisuttut takuaat nalunaarutigillugillu. Aasiaat politiivinut nalunaarutiginnittoqarpoq, taakulu qulimiguulimmik aaneqarput Aasiaat napparsimaviliaanneqarlutillu. Ikiorserneqaleruttortut oqaatigineqarpoq.