Saturday, July 15, 2017 - 11:18

Umiatsiaartut marluusut Aasiaat eqqaani annanneqarput

Assi.: Air Greenland
Inuit marluk umiatsiaaqqap motoorianik unittooqqasumiittut akunnerni arfineq pingasungajanni saavigussaaqqasut

Ippassaq ualilluaraa inuit marluk ajunngitsut umiatsiaaqqamiittut nassaarineqarput

Arktisk Kommando facebook-imi taama allapput.

Aasiaanniit tallimanngormat ullaralaakkut inuit marluk umiatsiaaqqamik aallarsimapput.

Arfernup eqqaani umiatsiaaqqamit ikioqqunermik kalerrisaarisoqarpoq. Pan-Pan. Tamatuma kingunerisaanik Aasiaat Radioat aqqutigalugu umiatsiaaqqap sumiiffia nalunaarutigineqarpoq, umiarsuit sumiiffiup eqqaaniissinnaasunit inuit marluk umiatsiaaqqamiittunik ikiuisinnaaniassammata.

Ullorortoq Kalaallit Nunaani Politiit aalajangerput pisoq SAR-imut (Search and Rescue) inissinneqassasoq umiatsiaaraq attavigineqarsinnaajunnaarmat. Ataatsip missaani Arktisk Kommando-p ujaasineq akisussaaffigilerpaa umiatsiaaraq saavigussaanissamut navianartorsiorsinnaammat.

Ilaatigut tysk-it umiarsuaat ilisimatusarnermut atorneqartoq kiisalu amerikarmiut umiatsiaq tingerlaatilik sumiiffiup eqqaaniissimapput. Pineqartut kalerrinneqarput ujaasinermilu peqataanissamut qinnuigineqarlutik. Erngertumik qinnuiginninnerlu qisuariarfigaat.
Ujaasinermi peqataatinneqarput tamatumani kutteri alapernaarsuut Tulugaq, S-61 qulimiguulik, politikutteri Sisak IV, inuinnaat umiatsiaat arfineq marluk kiisalu qulimiguulik Lynx sorsuuteeqqap Vædderen-ip qulimiguua, kalerriinerup nalaani sumiiffiusumut ingerlaartut.

Ualikkut tallimap qeqqata missaani Arktisk Kommando umiatsiat inuinnarnit pigineqartut ilaannit nalunaarfigineqarpoq inuit marluk umiatsiaaqqami ujaarineqartumiittut nassaarineqartut.
Nassaarineqartut qiiasimaqaat umiatsiallu orsussaarussimanera radio-llu batteereerussimaneri peqqutigalugit akunnerni arfineq pingasungajanni saavigussaaqqareersimallutik ajunngitsut nassaarineqarput.

Inuit marluk pineqartut Sisak IV-mut ikaarunneqarput, Sisak IV-illu inuit pineqartut umiatsiaallu apuulluarneqarnissaat isumagisimallugu.

Seneste nyheder / Nutaarsiassat kingulliit