killiffik
Umiatsiaararsortut 1200 tonsingajannik qaleralipput
Upernavik, Uummannaq aamma Qeqertarsuup Aqutsiveqarfinni Tunuani umiatsiaararsortut apriilimi qaleralinnik katillugit 1.185 tonsinik pisaqarput
Aqutsiveqarfimmi Uummannami umiatsiaararsortut 484 tonsinik qaleralissimapput, aqutsiveqarfik Upernavimmi 372 tonsit Qeqertarsuullu Tunuani 329 tonsit. Kisitsit Kalaallit Nunaanni Aalisarsinnaanermut Nakkutilliisoqarfiup apriilimi nalunaarsugaanneersuupput.
Aalisariutit aqutsiveqarfinni pineqartuni aalisariutit meterinik arfinilinnik anginerit qalerallit ukiortaamit apriilip naaneranut 2.975 tonsit pisarisimavaat, amerlanerpaat Qeqertarsuup Tunuani pisarineqarlutik, 1.795 tonsit.
Assagiarsuit
Assagiarsunnut aqutsiveqarfinni arfiniliusuni tassaasuni Narsaq – Qaqortoq, Nuuk – Paamiut, Maniitsoq – Kangaamiut, Sisimiut, Qeqertarsuup Tunua – Uummannaq aamma Upernavik assagiarsuit katillugit maannamut 460 tonsit pisarineqarsimapput.
Aqutsiveqarfimmi Nuuk – Paamiut assagiarsuit 383 tonsit januaarip aallaqqaataanit apriilip naaneranut pisarineqarsimapput, aqutsiveqarfinni allani tallimani 0 tonsimit 53 tonsinut pisarineqarsimallutik.
Saarulliit
Kitaani Tunumilu ukioq manna saarullittassiissutit 15.000 tonsiupput. Maannamut saarullittarineqarsimasut 1.283 tonsiupput.