Umiatsiaararsorlutik aalisartut akileraarutitigut ikiorserneqassapput

Inatsisissatut siunnersuummi juulip 20-ata tungaanut tusarniaassutigineqartumi tamanna atuarneqarsinnaavoq.

Ingerlaannaq nalikillisaasinnaaneq

Inuussutissarsiutigalugu aalisartut aquuteralammik pisinermi akimik ingerlaannartumik nalikilliliisarnissaannut periarfissinneqassasut siunnersuutigineqarpoq.

Umiatsiaararsorlutik aalisartut manna tikillugu pisinermi ukiumut 30 procentinik nalikillisaanissamut periarfissaqartarput.

- Inuussutissarsiutigalugu aalisartut aquuteralammik pisinermi akimik ingerlaannartumik nalikilliliisarnissaannut periarfissinneqassasut siunnersuutigineqarpoq. Tamanna inuussutissarsiummik ingerlatsisumut ukiumi pisiaqarfiusumi akiliisinnaassutsikkut iluaqusiissaaq, tamatuma nassatarimmagu, ukiumi pineqartumi aningaasarsiat akileraarutaasussaasut naatsorsorneqarneranni aquuteralammik pisinerup akia tamakkiisumik ilanngaataasinnaanera. Taamaasilluni ukiumi siullermi akileraaruteqarneq annikinnerussaaq, inatsimmut oqaaseqaatini tamanna atuarneqarsinnaavoq.

Sukkanerusumik aallartissinnaaneq

Akileraartarnermut naalakkersuisoqarfiup ilisimatitsissutigaa, inatsisip allanngortinneratigut ‘’akiliisinnaassutsikkutpitsanngoriaatip, inuussutissarsiummik ingerlatsisup assersuutigalugu motoorip aserornerani sukkanerusumik aquuteralassisinnaanera siuarsarsinnaavaa’’ taamaasilluni inuussutissarsiummik ingerlatsisup aalisarsinnaaffii killilersorneqassanatik.

Aalajangersagaq inuussutissarsiortunut umiatsiaaqqanik takornariartitsisunut atuutinngitsoq, inatsisissatut siunnersuummi erseqqissaatigineqarpoq. Aalisarnermik inuussutissarsiuteqarneq inuussutissarsiummik ingerlatsinermi piffissat aalisarfiit aaqqiivigineqartarnerisigut allanik sinaakkuteqartinneqarnera tamanna nassuiaatissartarigaa, inatsimmut oqaaseqaatini atuarneqarsinnaavoq, kiisalu aalisarnermit pisuussutinit iluanaarutinik akitsuutinik akiliisoqartarneranut atatillugu tamanna isigineqassammat.