ny sæson
Umiarsuit takornariartaatit siullersaat Qaqortumut apuuppoq
Sukkasuuliaq 'Fram' 191-inik ilaasoqarluni ataasinngornermi ullup qeqqata kingorna Qaqortumut tulappoq
Nalunaaqqutaq 13 ukioq manna umiarsuit takornariartaatit siullersaat Qaqortumut tikippoq.
Sukkasuuliami 'Fram'-imi ilaasut 191-it qularnanngitsumik nuannaajallassimassapput Reykjavikkimit angalaneq sivisooq aalalaarfiusimasoq naammassillugu nunamut tummarsinnagamik. Angallaviup aalavallaarnera pissutigalugu Qaqortumut apuunnissaq siuartinneqarpoq.
Ukiuni kingullerni takornariartaatit tikittussat siulliit sikorsuaqarpallaartarnera pissutigalu taamaatiinnarneqartarsimapput ukioq-mannali atugassarititaasut pitsaanerullutik. Angalanissamut pilersaarut naapertorlugu 'Fram' Qaqortukulooq, Qassiarsuk, Nuuk, Sisimiut, Ilulissat, Itilleq naggataatigullu Kangerlussuaq ornissavaat. Tamatuma kingorna umiarsuaq Uummanniassaaq ilaasunik allanik ilaasoqarluni.
Umiarsuaq Qaqortumiit nal. 19. ingerlaqqissaaq.