Umiarsuit takornariartaatit amerlanerusut Nunatsinnut tikittalissapput

Floridami umiarsuarnik takornariartitsisartut saqqummersitsineranni nalinginnaasumit amerlanerusunik isumaqatigiissusiortoqarpoq, nunani tamalaani umiarsuarnik takornariartitsinermik suliaqartut Nunarput isiginiarnerulersimarpasippaat.

Krydstogt, turisme
Ukiuni aggersuni umiarsuit takornariartaatit amerlanerusut 2.500-nik ilaasullik Nunatsinnut tikittarnissaat naatsorsuutigineqarpoq.

Fort Lauderdalemi kalaallit aallartitat saqqummersitsinermut Seatrade Cruise Globalimut peqataasut, neriulluarnermik immerneqarlutillu arlalinnik isumaqatigiissutiliorput, tamanna Visit Greenlandip tusagassiuutinut nalunaarummi nassiussaani atuarneqarsinnaavoq.

Umiarsuit 2.500 ilaasullit

- Umiarsuarnik takornariartaatiliutillit angisuut arlallit Kalaallit Nunaannut tikittalernissartik pilersaarutigaat. Tassani umiarsuit takornariartaatit 2.500-t missaannik ilaasoqartut pineqarput, nalunaarummi tamanna atuarneqarsinnaavoq.

- Peqataaneq pitsaasumik aningaasaliissutaalluarpoq. Saqqummersitsineq sioqqullugu isumaqatigiissusioreernikuuvugut, kisianni amerlanerusunik inniminniisoqarpugut aamma 2019-imut. Amerlanerusut ilikkariartortilluta suliassagut amerliartorput, Salik Hard, Greenland Cruisesimeersoq oqaluttuarpoq, taanna siullermeerluni saqqummersitsinermut peqataavoq.

Ilisimasoqarluni ingerlanissamut pisussaaffik

Ilisimasoqarluni ingerlanissamut pisussaaffimmut apeqqut, maanna Nunatsinni atuutsinneqalersimasoq sunniuteqarpoq, Jakob Nordstrøm, Greenland Pilot Servicesimeersoq isumaqarpoq.

- Ukiormanna Seatrademit nutaanik attavippassuarnik angerlaassivugut, ukiunilu 2018-2019 aamma 2020-imi sutigut tamatigut siuariarnissamik naatsorsuuteqarpugut. Kalaallit Nunaanni ilisimasoqarluni ingerlanissamut pisussaaffiup atuutilertinneqarnerata umiarsuaatileqatigiiffiit anginerit issittumi misilittagaqanngitsut Nunatsinnut angalarusulernerannik kinguneqarnera qularutissaanngilaq, Jakob Nordstrøm oqarpoq.

Pisoqassasoq

John Kjær Royal Arctic Linemeersoq aamma Lars Vajse Blue Waterimeersoq saqqummersitsinermut aamma peqataapput, ukiut marluk pingasulluunniit iluanni pisoqarnissaa ilimagaat, umiarsuit alapernaarsuutit nutaat issittumi Nunatsinnilu annertuumik takussaassaassallutik.

Powered by Labrador CMS