takornariaqarneq
Umiarsuarnik takornariat qanittukkut amerligunanngillat
Naak umiarsuarnik takornariat maanna ilaasunut akitsuummut akiliisarunnaartussanngoraluartut aatsaat ukiut arlallit qaangiuppata umiarsuarnik takornariartartut amerleratarsinnaapput. Kalaallit Nunaata umiarsuarnut takornariartarfinngorsinnaanera umiarsuaatileqatigiit qularaat
Kalaallit Nunaat umiarsuarlutik takornariartunut takutitassarpassuaqarpoq. Tassungalumi tunngatillugu ilaasut, angalatitseqatigiiffiit umiarsuarnillu takornariartitsisartut kalaallit naalakkersuisut takornariartitseqatigiiffiallu Visit Greenland isumaqatigaat. Qiviaannarlugu pilerinartutut isikkullip, umiarsuit takornariartaatit ingerlaarfiiniinnginnera ajornartorsiutaavoq. 2010-miilli umiarsuarnik takornariat 25 procentimik ikileriarsimapput.
Ajornartorsiullu taanna maanna umiarsuarni ilaasumut ataatsimut umiarsuit 100 dollarit missaannik akitsuummut akiliisittarunnaarneerisigut aaqqiivigineqarpoq, apeqqutaavorli Kalaallit Nunaat umiarsuarluni takornariarfittut pilerinartunngorsimanersoq - Nikalluallannartumillu taamaakkunanngilaq!
Royal Caribbean Cruise Line-mi, ilaatigut Svalbardimut takornariartitsisartumi, tuniniaanermut pisortaq Henrik Bergkvist oqarpoq umiarsuaatiminnut ikinnerpaamik 2.000-nik ilaasoqartartunut umiarsuaatileqatigiiffiup Kalaallit Nunaat tunulliussimagaa:
– Norgep sineriaa atuarlugu nordkapimi angalanitsinni sunik pissarsisinnaanerluta nalunngilara. Tassani akit 12.000-init aallartipput (annikinnerpaat, aaqqiss.), taakkulu tunisaalluartarput, taanna oqarpoq erseqqissaallunilu:
– Akit taama qaffasitsigitillugit untritilialunnik sipaaruteqarnissaq pingaaruteqanngilaq. Matumani misigisassat pingaarnerutinneqartarput. Ornigassanut immikkuullarissunukarusuttoqartarpoq, Kalaallillu Nunaat qularnanngitsumik arlalippassuarnik neqerooruteqassaqarpoq, angalaffissanilli pilersaarusiuleraangatta aamma allarpassuit eqqarsaatigisariaqartarpavut. Isumannaallisaanermut malittarisassat, minnerunngitsumillu naammassisinnaasat nunamullu niulluni misigineqarsinnaasut. Umiarsuaativulli Kalaallit Nunaanni pissutsinut angivallaarsoraakka, Henrik Bergkvist oqarpoq.
Visit Greenlandimi pisortap tulliata Anders Ulrich la Cour Vahl-ip nassuerutigaa akitsuutit appartinnerat kisimi naammanngitsoq. Taassumalu ukiuni aggersuni Kalaallit Nunaat umiarsuarnik takornariartaatinik ornittakkatut pilerinartunngortinnissaanut aningaasaqarnermut tunngasut ataatsimut isigalugu pingaaruteqartut aalajangiusimavaa.
– Ukiorpassuarnimi ilaasunut akitsuutip qaffafsippallaarnera erseqqissaatigisarsimavarput, maannalu taanna annertuumik apparneqarpoq. Tamanna nuannerpoq pitsaasunillu kinguneqassaaq. Qanorli kinguneqarumaarnera massakkorpiaq erseqqissumik oqaatigisinnaanngilara, taamatulli periarneq soorunami kisimi naammanngilaq, Anderes Ulrich la Cour Vahl oqarpoq.
Allaaserisaq tamaat AG-mi sapaatip akunnerani saqqummersumi atuaruk, taanna ataani e-avis-itut pisiarisinnaavat.