Angallanneq
Umiarsuarmik angalasinnaassaagut
Kujataani angallannermut pissutsit pilersaarusiorneqarneranni eqqaamaneqartassaaq Qaqortumiit Aappilattumut inoqarmat, Nanortalimmi Siumumeersoq Anders Olsen oqarpoq
– Ukiuni kingullerni nunatta kujataani angalaniarnikkut pissutsit eqqartorneqaraangata Qaqortup mittarfissaanut tunngassuteqartoq oqallinnermi assut qitiutinneqartarpoq. Tamanna aamma kingumut takuneqarsinnaavoq qineqqusaarnerup ingerlanerani. Eqqaamassavarpulli Qaqortumiit kujasinnerusoq aamma inoqarmat, Siumut tunuliaqutaralugu Inatsisartunut qinigassanngortittoq Anders Olsen, Nanortalimmiu, oqarpoq.
– Isumaga malillugu kujataani angalaniarnikkut atukkat pitsanngorsaavigineqarnissaannut suliassaq siulleq tassaasariaqarpoq qavani Aappilattuniit avannamut Qaqortup tungaanut aqqutit pitsanngorsaavigineqarnissaat, taanna erseqqissaavoq.
– Ukiunimi maanna amerlasuunngortuni nunatta kujaterpiaani najugaqartut politikkerinut oqariartuutigisartagaat tassaammata angalaniarnikkut atukkatigut pitsanngorsaavigineqarnissaq. Ullumikkut nunatta kujaterpiaani angalaniarnikkut periarfissaq taamaallaat silaannakkut periarfissaatillugu angalaniaraluit ilaatigut inissaqanngitsoortarnerat takornartaanngilluinnarpoq. Kiisalu aamma atuisunut akit nammanneqarsinnaanngitsut atortinneqarnerat aamma angalanianut annertuumik eqquisarnera arajutsisimaneqanngitsoq iliuuseqarfigisariaqalerparput, Anders Olsen oqarpoq.
– Qangaanerusoq silaannakkut imaatigullu angalaniarnikkut periarfissarititaasut uterfigeqqinneqartariaqarput ataqatigiissaarluakkamik. Isumagalu naappertorlugu silaannakkut kiffartuussineq allanngortinngikkaluarlugu ukiup annersaa imaatigut ilaasortaatinik taperlugu periarfissiissutigineqarnissaa kujaterpiaani innuttaasut kissaataasa annersaat ataatsimoorluta kivittariaqalerparput, taanna tikkuaavoq.
– Inuiaqatigiit tamatta akileeqqataaffigisatsinnik Qaqortoq aamma Narsaq sinersortaammik tikinneqartarput, kiisalu namminersortut imaatigut angallassissutaat aamma periarfissaallutik. Ila kujaterpiaani najugaqartuusugut periarfissanik taamaattunik peqaraluarutta qanoq iluarisimaarinnitsigissagaluarpugut, Anders Olsen isumaqarpoq piumasaraalu Aappilattormiunut, Narsarmijermiunut, Tasiusarmiunut, Nanortalimmiunut, Ammassivimmiunut, Allutsup Paamiunut, Saarlormiunudt Eqalugaarsummiunullu angallannermut pissutsit pitsanngorsarneqassasut.