Aalisarneq
Umiarsuaq tunitsivissaq Krusep akuersissutigaa
Sisimiut Kangaatsiallu akornanni tunitsivimmik umiarsualiisoqarnissaa arlallit ujartuiffigisimavaat. Massakkulli umiarsualiisoqarnialerpoq.
Royal Greenland-ip tunitsivimmik umiarsualiinissamik qinnuteqaataat akuerineqartoq, Aalisarnermut Piniarnermullu Naalakkersuisoq Karl Kristian Kruse paasissutissiivoq.
Akuersissut tunniunneqartoq
Inatsisartuni ilaasortat Nikolaj Jeremiassen aamma Hans Aronsen piffimmi aalisartorpassuit sinnerlugit tunitsivissamik ujartuisimapput.
- Siullermik erseqqissassavara umiarsuarmik tunitsiviliisinnaasut tassaammata ullumikkut tunitsiveqartitsereersut. Tamanna tunngaviligaavoq umiarsuarnik tunitsivinnik periusissiakkut aalajangersarneqarsimalluni. Royal Greenland Sisimiut eqqaanni aamma Kangaatsiap eqqaani tunitsiveqartutut umiarsualiinissaminik qinnuteqarmat akuersissutigineqarsimavoq. Taamaammat Naalakkersuisutut naatsorsuutigivara Kangaatsiap eqqaani pisariaqartitsisoqarnerani RG umiarsuarmik tunitsiviliissasoq, Karl-Kristian Kruse oqarpoq.