Umiarsuaq takornariartaat
Umiarsuaq takornariartaat motooriminik ajutoortoq
Umiarsuaq Sea Adventurer Nuummi uninngajallarpoq motooriminik ajoqquteqarnini pissutigalugu
Umiarsuaq takornariartaat Clipper Adventurerimik ateqarsimasoq maannakkut Sea Adventurerimik ateqartoq ajornartorsiuteqaqqippoq. Umiarsuaq Ilulissat eqqaanni motooria ajornartorsiuteqalerpoq, Nuummukaanneqartariaqarsimalluni.
Umiarsuaq 118-nik ilaasoqarsinnaavoq, takornarissanik Nunatsinnukaassisarluni. Umiarsuaq Nunaviliartussaagaluarpoq, tassanngaanniit Labradoriliartussaalluni.
Naqqarmittoq
- Umiarsuup naalagaata oqaatigaa umiarsuaq Nuuliaanneqartoq suliarineqartussanngorlunilu. Canadaliannginnermi suliarineqassaaq, Adventure Canadameersoq Alana Faber nalunaarpoq. Taanna billetsinik umiarsuarmut tuniniaasuuvoq.
Sapaatit akunnerini marlunni suliarineqarnissaa naatsorsuutigineqarpoq. Taamaattumik ilaasut timmisartuunneqarput.
Umiarsuaq Clipper Adventurerimik ateqarallarami Sullualummi 2010-mi naqqarmippoq, ilaasut ikiorserneqartariaqarlutik.