Umiarsualiviup eqqaani qilalugarniartut akiligassinneqarput

Sisimiut umiarsualiviata ungasinngisaani qilalukkamik piniartunut tunngatillugu suliaq Sisimiuni politiinit naammassineqarsimasoq ilisimatitsissutigineqarpoq.

Pisoq januaarip naanerani pivoq, tassani illu, inersimasumik meeqqamillu illup iluaniittoqartillugu, illu aqerlumit eqqorneqarpoq.

- Piniaqataasut qulingiluat tamarmik 3.000 koruuninik akiligassinneqarput, Sisimiut politiivini aqutsisoq Karl Jørgen Lennert Sermitsiaq.AG-mut oqarpoq.

Sumut tamaanga eqqartut
Umiarsualiviup ungasinngisaani qilalukkamik qaqortamik piniarnermi, piniartut sumut tamaanga eqqarsimasut navianartorsiortitsisimasullu, oqaatigaa.

Politiit najoqqutaat naapertorlugit inuit taakku akiligassinneqarput. Illoqarfiup iluani aallaammik seqqortoqaqqusaannginnera unioqqutippaat.

Akiligassinneqartut tamarmiullutik akiligassaq akuerisimagaat Karl Jørgen Lennert ilisimatitsivoq.