Royal Arctic Line
Umiarsualivittaami kiffartuussinerup ajorseriarnera kamaatigineqartoq
Nuummi umiarsualiviup nutaap truckinik kiffartuussineq atorunnaarniarlugu aalajangerpoq, umiarsualivitoqqami atuisorpassuarnut oqimaatsunik nassiussisartunut tamanna iluaqutaasarsimavoq. Atuisut akornanni tamanna kamaatigineqarpoq. Tamanna isumannaallisaanermut tunngassuteqartoq, Royal Arctic Line nassuiaateqarpoq.
Suliffeqarfik Northern Equipping annertuumik eqqugaassaaq, atuisunullu akit qaffattariaqarnissaat ilimagaat, nassiussanut aningaasartuutit amerlerujussuarnissaat pissutigalugu.
Oqimaappallaartut
Sermitsiamut saaffiginnissummi Arnannguaq aamma James Thiesen kiisalu Jørgen B. Jensen, truckinik kiffartuussisarsimaneq sooq taakkununnga taama pingaaruteqarsimatiginersoq nassuiaapput.
- Kalaallit Nunaat tamakkerlugu aallaasinik, imassanik piniarnermullu atortunik nassiussuisarpugut. Pallet aamma usit tamalaat sinerissamut nassiussassanngorlugit tunniuttakkagut kivissinnaasatsinnit oqimaannerummata, truckimik piseriarluta umiarsualivimmut ilinngikkutsigu, imaluunniit lastbilimik palletinik kivitsisinnaasumik pisinngikkutta, suliffeqarfipput niuertunut nioqquteqartoq nioqqutissanik eqqussuisoq ingerlassinnaajunnaassavarput. Nassiussassagut assatsinnik palletsinut usilersortarpagut, kisianni bilimik palletsinik kivitsisinnaasumik peqanngilagut, taakku nalorninartumik inissisimalernertik pillugu nassuiaapput.
Oqinnerulernani ajornarnerulertoq
- Umiarsualivittaap Kalaallit Nunaanni ajornannginnerusumik niuernermik ingerlatsilersitsisussaasorigaluarparput, kisianni ajornerulerpasippoq, taakku oqarput, taakkulu nassiussinermi saniatigut aningaasartuutit Nunatsinni atuisunut piniarnermik ingerlataqartunut tutsittariaqassallugit ilisimatitsipput.
Umiarsualivimmilu allagartaliussaq atuisunut asissuinerusoq isumaqarput, Royal Arctic Line allappoq: We make it easy to do business with Greenland. (Kalaallit Nunaanni niuerneq ajornannginnerulersipparput, aaqq.).
Atuisunut kiffartuussinermi pisortaq Ivalu Kleist, Royal Arctic Line, isumannaallisaanermut tunngatillugu, poortuisarfimmi tamanut angallaffigineqarsinnaasumi truckinik ingerlasoqartassanngitsoq aalajangertoqarsimasoq, Sermitsiaq.AG-mut ilisimatitsivoq.
- Nassiussat sumiiffinnut nalunaarsorneqarsimasunut tunniunneqartalissapput. Tassani nassiussat angallanneqarnissamut qaqugukkut tunniunneqarsimanersut ersarissumik takuneqarsinnaasumik akisussaaffiup agguarneqarneranik pilersitsivugut, Ivalu Kleist ilisimatitsivoq.
Aaqqiissut pisiarineqarsinnaasoq
- Taamaammat atuisut pallenik nassiussisut lastbilinit atorneqarsinnaasunit tunniunneqartarnissaat qulakkeertariaqarpaat. Royal Arctic Linep tamanna aaqqiissut ingerlatsinermut akinut nalinginnaasunut neqeroorutigaa, soorlu angallassisartorpassuit allat taamatut kiffartuussisinnaasut, kiffartuussinermut pisortaq ilisimatitsivoq.