Ilulissat

Umiarsualivimmi inissamik ajornartorsiuteqarneq

Ilulissani umiarsualivik umiatsiarpassuaqarpoq. Ima amerlatigipput puttasuni inissarsinissamut utaqqisoqarluni. Taama Ilulissani umiatsiaatillit peqatigiiffiata Ilupe Bådelaugip siulittaasua oqaluttuarpoq, kommunillu umiarsualiveqarfiup allilerneqarnissaanik sulissutiginninnissaa kissaatiginerarlugu

Ilulissani ingerlalluartoqarpoq. Taamaattumik inuppassuit umiatsiatik nutaanik anginernillu taarsersimavaat, tamannalu umiatsialivimmi inissap tungaatigut ajornartorsiummik pilersitsilluni. Assi toqqorsivimmit

Ilulissani siuariartorneqarpoq. Aalisarneq sanaartornerlu ingerlalluarput aningaasarsiornermut iluaqutaasumik, tamannalu umiatsialivimmi takuneqarsinnaavoq.

Angallatit arlallit anginernik akisunernillu taarsersorneqarput, tamannali umiarsualivimmi inissat eqqarsaatigalugit ajornartorsiutinik pilersitsilluni, Ilulissani Ilupe Bådelaugip siulittaasua, Flemming Stidsborg, oqarpoq.

– Umiarsualivimmi maannakkorpiaq 10-12-inik utaqqisuuteqarpugut, kisiannili alliliinissamut periarfissaqarata, Flemming Stidsborg oqarpoq, oqaluttuarlunilu Ilupe Bådelaug 120-nik ilaasortaqartoq.

Akeqassasoq
Qaasuitsup Kommuniani umiarsualivimmi inissamik killeqartumik ajornartorsiut ilisimaarineqarpoq. Taakkua aaqqiissutissatut periarfissanik arlalinnik aamma misissuisimapput. Tamannali akisussalluni

– Aaqqiissutissat misissorsimasavut arlallit koruuninik millionilikkuutanik akeqassapput, taamaattumik aaqqiissuteqarsinnaanngilagut. Kisianni suliassaq sulissutigaarput, Qaasuitsup Kommuniani ingerlatsinermut avatangiisinullu pisortaq, Søren Lindenhann, oqarpoq, umiarsualiviullu pioreersup allilernissaanut taarsiullugu umiatsialiviit arlallit pineqalersinnaanerat uppernarsarlugu.

Flemming Stidsborg naapertorlugu pingaartumik puttasuni inissaq ajornartorsiutaavoq. Amerlanerit umiatsiatik ukiornissaanut illumik eqqaannut inissittarpaat, inissiisarfinnut taarsiullugu.

Allaaserisaq tamaat Motoorimi atuaruk. Biilit angallatillu pillugit Motoori saqqummersinneqartartoq Sermitsiap imaraa:

Powered by Labrador CMS