Ulrik Lyberth matusivoq

Qeqqussanik tuniniaanermik aallarnisaasoq, Ulrik Lyberth Sisimiormiu, Qeqqussanik tunisassiorfik Royal Greenlandimi attartorsimasani ullumi ataasinngornerup ullaatungaani ullaakkut utertippaa.

- Misigissuserpassuit atorpakka, pakatseqqaneq, ugguarneq qujamasunnerlu, Maki Seaweedimik pilersitsismasoq, Ulrik Lyberth Sermitsiaq.AG-mut oqaluttuarpoq.

Taanna 2012-miilli Nunatsinni niuffaffinnut qeqqussanik tunisassiulersimavoq, ilaatigulli Brugsenimut Pisiffimmulli tunisaqartarsimalluni.

Tapersersorneqarpallaaranilu ikiorneqarpiarsimanngitsoq

Ukiut arlallit suliffeqarfik allileriarlugu avammut nioqqutissiulernissamik takorluuisarsimalluni, pisortanit oqartussaniillu tapersersorneqarnini ikiorneqarninilu annikippallaarsorilerlugu Maki Seaweed matuaa.

- Kommuninut, Namminersorlutik Oqartussanut, Nunaqarfinni siulersuisunut allarpassuarnullu oqalugiartarnikkut qaammarsaajuaraluarlunga aamma siuarsaaniarlunga pisortaqarfinnut saaffiginnikkaluarlunga suna tamarmi uannut uteqqittarami, Ulrik Lyberth oqarpoq.

Taassuma ilimagaa, ineriartortitsiniarnermini avammulli nioqquteqalernissami anguniarnerani pisortaqarfiit oqartussallu qanoq iliuuseqarnissartik nalornissutigigaat.

Periarfissagissaaraluartoq

- Nunatsinni qeqqussanik tunisassiorneq periarfissagissaaraluarpoq, arlaleriarlungali tapersersortissarsiorlunga saaffiginnissuteqartarnera akissummik pissarsineq ajorama qatsussivunga, taanna oqarpoq.

Kingullertigut Ulrik Lyberth umiatsiaaraq qeqqussanik katersissutigisartakkami taarserneqartariaqalernera pissutigalugu, umiatsiaaqqamut tapiiffigineqarnissamik qinnuteqarsimangaluarpoq. Tapiiffigineqarsinnaasimanngilarli, taannami naapertorlugu aalisartut takornariaqartitsinermilluunniit ingerlatallit kisimik tapiissuteqarfigineqartarput.

- Allanik periarfissaqarnerlunga siunnersorneqarsinnaanerlungaluunniit apeqqutigisimangaluarpara. Akissuteqarfigineqanngilangali, qeqqussanik tunisassiornermik aallarnisaasoq oqarpoq.

Qanoq iliortoqassava?

- Qeqqussanik tunisassiornerit ingerlaannassappat, suliffeqarfiutillu ingerlaannassappat, pisortaqarfiit oqartussallu qanoq iliussappat?

- Inuussutissarsiutitut allatuulli akuerineqartariaqarpoq, nunaqarfinni illoqarfinniluunniit minnerusuni tunisassiorsinnaanissamut qaammarsaasoqarnissaa aamma aallartitsisoqarnissaa taperserneqartariaqarpoq, Ulrik Lyberth oqarpoq.

Qeqqussanik tunisassiorneq atortorussaarutitigut annertuumik pisariaqartitsinanilu nunaqarfiit ineriartortinneqarnissaannut naleqqulluartoq taassuma erseqqissaassutigaa. Kalaallit Nunaannili Uumasunut Nakorsaqarfik Inuussutissalerinermullu Oqartussaaffiup aporfilersuinera Ulrik Lyberthip eqqaavaa.

- Qeqqussanik tunisassiornissap illup iluani ingerlanneqartanissaanik piumasaqaat oqilisaaffigineqarsinnaangaluarpoq, aasaaneranili nakkutigineqartumik silami qeqqussanik panersaasinnaaneq periarfissanngortillugu, Ulrik Lyberth oqarpoq. Kinamilu Nunatsinniit silaannaa mingutsitaanerusimangaluarluni silami qeqqussanik tunisassiortoqartarnera aamma erseqqissaassutigaa.

Qeqqussat kingulliit tuniniarai

Qeqqussat tunisassiarisimasani toqqorsivimmiititani tuniniassallugit aammalu siunissami sulerissanerluni paasiniassallugu, taassuma paasissutissiaraa.

Qeqqussanillu tunisassiornissamik takorluugaqarnini taamaatiinnarnaviarnagu erseqqissaatigaa, aammalu suliffeqarfiit pisortaqarfiilluunniit ilisimasaanik pisariaqartitsilissangaluarpata siunnersortaalluarsinnaaluni oqaatigalugu

Ulrik Lyberth ilinniartitsisutut ilinniagaqarsimavoq, suliffeqarfillu Maki Seaweedip aallarnisarnialernerani atorfimminit tunuarsimalluni.