Ullumikkumiit allakkatigut qinersisinnaavutit

Ulloq qinersivimmi qinersisinnaanngikkaanni allakkatigut qinersisoqarsinnaavoq.

Kommunimi inuit nalunaarsorsimaffianni, tassa folkeregisterimi allakkatigut qinersisoqarsinnavoq. Inuit nalunaarsorsimaffiitut aamma paasineqassapput kommunimi najugaqarfiup pingaarnerup avataani kommunip allaffii.

Napparsimmavinni imaluunniit peqqissartarfinni paaqqutarineqartarfinniluunniit allani uninngasut aammalu pinerluuteqarsimasunik isumaginnittoqarfiup inissiisarfiani inissinneqarsimasut aamma allakkatigut qinersisinnaapput.

Qinersisartut najugaqarfinni avinngarusuni najugaqartut inummi qinersinermik siulersuisut toqqagaanni allakkatigut qinersisinnaapput.

Qinersisartut umiarsuarni Kalaallit Nunaanni angerlarsimaffeqartuniittut umiarsuup naalagaanit taassumaluunniit toqqagaanit qinersisinnaapput.

Silasiorfinni timmisartunullu mittarfinni il.il. allakkatigut qinersisoqarsinnaavoq inummi Qinersinermut ataatsimiititaliamit piginnaatinneqartumi.

Qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut qinersisinnaapput.

Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini qinersisinnaapput.

Qaammatini kingullerni arfinilinni Kalaallit Nunaanni najugaqarsimasut tamarmik allakkatigut qinersisinnaapput. Ulloq 13. marsip kingorna Kalaallit Nunaanni kommunimiit kommunimut allamut nuussimaguit kommunimut najugarisimasannut allakkatigut qinersissaatit, allassimavoq.

Qinigassanngortitat partiillu qinigassanngortitsisut allattorsimaffii kommunip allaffiini Innuttaasunut Sullissivinni, Namminersorlutik Oqartussanit nalunaarutigineqariarpata, takuneqarsinnaalissapput.