Ullumi Nunat Avannarliit pillugit erfalasoq amuneqarpoq

Ullumi sapaammi marsip 23-anni Københavnimi bussit aatsaavissuaq siulllermeersumik Svaneflag-imik erfalasoqarput Nunat Avannarliit Ulluat malunnartinniarlugu.
Tamanna pivoq nunat avannarliit suleqatigiinnerat, nunarsuarmi nunarsuup immikkoortuani suleqatigiinnerit pisoqaanersaat annertunersaallu, nalliussiniarlugu. Nunat avannarliit ukiuni 200-ni eqqissisimaqatigiissimapput. Nunat avannarliit ataatsimut sulisartoqarnerat ukioq manna ukiunik 60-iliivoq, nunanilu avannarlerni innuttaasut 100.000-t sinneqartut nunami avannarlermi allami sulipput. Nunat avannarliit killeqarfeqanngitsut, inuit, ingerlatsiviit nioqqutissallu killeqanngitsumik nunat akornanni angalaffigisinnaasaat nalissaqanngilluinnartuuvoq, ataasimullu isigalugu nunat avannarliit Danmarkip avammut tuniniaaviisa pingaarnersaraat.
Taamatut allappoq um.dk
Ilanngullugu nalliussineqarpoq nunat avannarliit naligiissitaaneq ukiuni 40-ni suleqatigiissutigisimammassuk, naligiissitaanerlu Nunat Avannarliit nunarsuarmi tusaamasaassutigaat. Nunat avannarliit Svanemærkiat aamma ukioq manna nalliussivoq, avatangiisinullu meqqi ukiunik 25-inik pisoqaassusilik Nunani Avannarlerni amerlanerpaanit ilisimaneqarpoq, nunarsuullu sinnerani avatangiisinut meqqiliinermi maligassiuisuulluni.
Carsten Hansenip, nunani avannarlerni suleqatigiinnermut ministerip, aamma Bertel Haarderip, Nordisk Rådimi qallunaat aallartitaasa siulittaasuata, ullumi Politiken-imi oqallisissiatut ilanngussaminni erseqqissarpaat nunat avannarliit ataatsimoornerat suleqatigiinnerallu suli pitsaanerulersinnaasoq.
– Nunat avannarliit suleqatigiinnerat ineriartortinneqassaaq, taamaasilluni nunat avannarliit aningaasarsiornikkut isumaginninnikkullu nunarsuaq tamaat isigalugu suli nukittunerulerniassammata. Piffissami sivisoorujussuarmi suleqatigiissimavugut. Tamanna ineriartortissavarput, nunarsuup immikkoortuatut suli nukittuneruleqqulluta. Tamanna ullumi nalliussivarput Københavnimi bussit erfalasoqartinnerisigut, nunani avannarlerni suleqatigiinnermut ministeri Carsten Hansen, S, oqarpoq.
– Ukiuni 200-ni eqqissisimaqatigiissimavugut. Inuiaqatigiittut periutsivut nunarsuarmi tamarmi tusaamasaassutigaavut. Nunat avannarliit alloriarfiit siulliusarput ingerlatsiviit nunani allani pilersitsinialeraangata. Immitsinnut pisuunngorsarpugut nukittorsarlutalu oqaatsitigut kulturikkullu ataatsimuussutsivut pissutigalugit. Maannalu aamma sakkutuutigut nunanullu allanut politikkimi suleqatigiippugut, Sorsunnerup Nillertup nalaani taamaasiorsinnaasimanata Finland eqqarsaatigalugu, Nordisk Rådimi qallunaat aallartitaasa siulittaasuat Bertel Haarder (V) oqarpoq.