Imaani isumannaallisaaneq
Ulloq pujuliorfiuvoq marlunnik qaartoqanngitsoorpoq ataatsimillu taamaatitsisoqarluni
Marlunngormat umiartortut 36-it silaginnerani pujuliortitsipput. Ajunaalernermilu kalerrisaarutit qanoq atorneqartarnerannik ilitsersuunneqarlutik.
Nuummi Imarsiornermi Ilinniarfimmi isumannaallisaanermut pikkorissartuupput. Qulimiguullillu unnukkut takusinnaasaannik ajunaalernermi ikumatitakkat qanoq atorneqartarnerannik ilitsersuunneqarlutik.
Qaanngitsoortut marluk ataaserlu taamaatilluni
Allaanerlu – qillertuusatut isikkulik, pujuliortitsisartut – aappaluaartumik putsumik annertuumik pilersitsisartoq. Qillertuusat qaamanerani imaanut ingillugit atorneqartarput. Aappaluaartoq silaannarmi uangasissumiik takuneqarsinnaavoq.
Sungiusarnermi pujuliortartut marluk qaanngitsoorput. Aap, taakku pujuliunngitsoorput. Tamannalu pissutigalugu pikkorissartitsiviup pisortaata, Thomas Bruun de Neergaardip, taakku ikuallaaviliaassimavai ulorianartorsiortitsiunnaarlugit.
- Pikkorissartunut pingaaruteqarput isumannaallisaanikkut atortut qanoq atoneqarnissaannut ilisimasaqarnissaat, Thomas Bruun de Neergaard pikkorissarnerup siunertaanik paasissutissiivoq.
Ajunaalernermi qummoroortaateqanngilaq
Ajunaalernermi qummoroortaatit kigaallassaatitallik taamaatittariaqarsimavai.
- Ajunaalernermi qummoroortaatit 36-it illoqarfiup nalaanut aallakaatinneqartussaagaluit kujasissumik anorsaarnera pissutigalugu taamaatittariaqarsimavarput, ullorli alla aallakaatitsisoqassasoq, Thomas Bruun de Neergaard paasissutissiivoq.
Pikkorissartut assigiinngitsut
Isumannaallisaanermi pikkorissartut inuussutissarsiutigalugu aalisartuupput, pikkorissarnerlu sapaatip akunnerini pingasuni ingerlanneqarluni. Peqataasulli allat umiarsuaaqqani inunnik 12-it tungaanut ilaasoqarsinnaasuni aquttuupput taakkuli sapaatip akunneri sisamani piukkunnassutsimut misilitsittuullutik.
- Isumaqatigiissuteqarnitsigut sullitagut amerleriarput, ilinniarfimmilu imaani isumannaallisaaneq pingaartinneqartoq pikkorissaanermi, pisortaq oqarpoq.