Ulf Fleischer Paarisa Band-ilu Kalaallit Nunaat Tivolimi pingaarnertut nipilersussapput

39-issaa tulleriisiinnarlugu Kalaallit Nunaata Københavnip qeqqani aliikkusiartarfitoqaq tiguassavaa, Kalaallit Nunaat Tivolimi ingerlanneqalerpat.

Ukioq mannalu nuannisaqatigiinnermi misigineqarsinnaapput kalaallit nipilersortartorpassuit, quiasaarineq, meeqqanut aliikkusersuineq, oqaluttuatoqqanik oqaluttuarnerit tuniniaaviillu sanalukkanik, tuttumik burgerinik kalaallillu atisaliaannik tuniniaasut.

Nanook

Nipilersornermi nipilersortartut ilisimaneqartutoqqat kiisalu nutaat pissanganartullu nipilersussapput. Tamakkua tassaappput Simon Lynge, Nanook, Kimia, Small Time Giants, Hinnarik, Yuarakq, Nikolaj Lønstrup, naggataatigullu tusarnaartitsinersuarmi nipilersussapput Ulf Fleischer & Paarisa Band.

–Programmimik ukioqatigiinnut tamanut saaffiginnittumik, tamannalu peqatigalugu kalaallit qanga nutaaliamillu nipilersortagaannik sananeq annertuumik unammilligassaasimavoq. Isumaqarpugut tamanna ukioq manna iluatsilluarlutigu. Kalaallit Nunaat Tivolimi peqataaasunut nipilersukkat tamatigut katersuuffiusarput, taamaattumik tulluusimaarutigaarput ukioq manna nuannisaqatigiinnermut kalaalliut nipilersortartut nuannarineqartut assigiinngitsullu taama amerlatigisut takutissinnaagatsigit, Miki Jensen, inuit aaqqissuisooqatigiit pingasut sinnerlugit oqarpoq. Aaqqissuisooqatai allat marluk tassaapput Pipaluk Lind aamma Kim Falck-Pertersen.

Sassuma Arnaa

Ukioq manna festivalernermi oqaluttuatoqaq »Sassuma Arnaa« Tivolis Akvarium-imi saqqummiunneqassaaq, tassani Nuka Alice Lundip oqaluttuatoqaq takutissammagu qulliit nipillu assigiinngitsut atorlugit, ilaatigut aqqartartut akvariami immap iluani oqaluttuaq takutissallugu.

Akvaria aamma atorlugu elektroniskimik eqqumiitsuliortoq Uyarakq nipinik immikkut illuinnartunik pilersitsiniarpoq, misigisassarlu tamanna qularnanngitsumik pissanganassaqaaq.

– Tamatigut nutaanik misileraasarpugut imaanullu siammaaniartarluta. Siusinnerusukkut akvaria atorsimanngilarput, pilersaarusiornermili Tivolimi angalaaratta isumaqarpugut Tivolis Akvarium immikkoorluinnaq nipaatsumillu avateqartoq. Pulaartunut misigisaq immikkut illuinnartuusinnaavoq, Miki Jensen oqarpoq.

Pantomimeteatret

Juulip 31-at tallimanngorniussaaq, tamannalu pissutigalugu "Kalaallit Nunaat Tivolimi" aamma Tivolip "Fredagsrock"-ia ataatsikkut ingerlanneqassapput, tassani nipilersoqatigiit skotlandimiut Belle & Sebastian unnukkut Plænen-imi nipilersussallutik. Kalaallit Nunaat Tivolimi aalajangersimavoq nipilersornerit scene-t annersaata tulliani, Pantomimeteatret-imut nuunneqassasut, taavalu aggustip aallaqqaatani Plænen nuannisaqatigiiffigineqassalluni.

Kalaallit Nunaat Tivolimi Tivolimut ilaanngilaq, nammineerlunili suliniutaalluni, nuannisaqatigiinnerit aaqqissuunnerannut nammineq aningaasassarsiortartoq.

Progammi tamaat takuuk uani www.git.gl