Aningaasanut inatsit

Uldum: Sipaarniarnermi pilliutigineqartussat suli oqaatigineqarsinnaanngillat

Aningaasaqarnermut naalakkersuisup Anda Uldumip Demokraatineersup oqaatigisinnaanngikkallarpaa Aningaasanut inatsimmi 2015-mi sipaarniarnermi suut pilliutigineqassanersut aamma qanoq pilliuteqartoqassanersoq

Aningaasaqarnermut naalakkersuisoq Demokraatinit Anda Uldum

Aningaasaqarnermut inatsimmut siunnersuummi ukiumi matumani 85 million koruunit pallillugit amigartoornissaq Naalakkersuisunit ilimagineqarpoq, 2018-imili naatsorsuutit oqimaaqatigiilissapput.

2018-imi oqimaaqatigiisitsinissaq isumannaarniarlugu sipaaruteqarnissat ingerlatsinikkullu suliniutit nutaat Naalakkersuisut siunnersuutigaat. 2018-ip tungaanut Namminersorlutik Oqartussani allaffissornikkut ingerlatsinikkullu ataatsimut ukiut tamaasa 50 million koruuninik sipaaruteqarfissanik nassaartassapput. Tulliullugulu sakkunik Naalakkersuisut eqqussissapput, pisortat aningaasaataannik aqutsilluarsinnaanerusunik.

Sipaarniarnermi suut pilliutigineqassanersut suli oqaatigisinnaanagit aningaasaqarnermut naalakkersuisoq Anda Uldum Demokraatineersoq Radioavisimut oqarpoq. Aamma qanoq pilliuteqartoqassanersoq oqaatigisinnaanngilaa.

- Kisianni ilimaginngilara una soraarsitsiortornermik una kinguneqassasoq.Una Namminersorlutik Oqartussat ingerlatsiviini 50 millioner koruunit sipaarniutigineqassasoq siunniussimavarput, aamma taanna piviusorsiortuuvoq anguneqarsinnaasoq, Anda Uldum KNR-mut oqarpoq.

Aningaasanut Inatsit aappassaaneerneqarnerani imaluunniit pingajussaaneerneqarpat, aningaasat suminngaaniit aaneqassanersut saqqummiunneqassasut erseqqissaatigaa.

Powered by Labrador CMS