Avannaa
Ukiuunerani issip tunisassiorfiit marluk eqqorpai
Atammimmi Attumilu erngup aqqutaa qerisimammat nunaqarfinni taakkunani Royal Greenlandip tunisassiorfiiini tunisineq unitsinneqarallarpoq
Atammimmi aamma Attumi Royal Greenlandip tunisassiorfiini aalisakkanik tunisineq unitsinneqarallarpoq.
Tunisassiorfiit taakku marluk marlunngornermi erngup aqqutaasa qerinerinik peqquteqartumik tunisiffigineqarsinnaanngillat.
- Erngup aqqutaa qerisoortoq Nukissiorfinniit aaqqinniarneqarpoq, taamaattumik neriuppugut pingasunngorpat tunisisoqaqqissinnaalissasoq, Atammimmi Royal Greenlandip tunisassiorfiani ingerlatsisoq Erik Henriksen suliffeqarfissuaq naapertorlugu taama oqarpoq.
Tallimanngormat Atammimmi tunisassiorfimmut tunineqartut tunisassiarineqarmata tunisassiorfimmi sulisut angerlartinneqanngillat.
Erngup aqqutaa qaarsimavoq
Attumi erngup aqqutaa ruujori qerilluni qaarsimavoq.
- Saarulliit karsit 40-it ullaaq tunineqartut tunisassiarisinnaangikallarpavut aatsaalli ruujori aserortoq aaqqippat tunisassiarisinnaasaallutigik. Taamaattumik aamma erngup aqqutaa aaqqitsinnagu aalisartut tunisisartut 17-iusut tunisisinnaanngillat. Kisiannili neriuutigaarput ullumikkut erngup aqqutaa aaqqissinnaassallutigu, Imiina Hammond oqarpoq.
Attumili tunisassiorfimmi sulisut allamik aamma ajornartorsiuteqarput.
- Traktori tunisat assartornerini atorneqartartoq aserornikuuvoq, taartissaatali tikissiisaa Pilersuisup biilii assartuinitsinni attartortarpavut. Ajoraluartumillu taakku biilit aamma issinnera pissutigalugu ullaaq manna allartissinnaasimanngimmata tunisineq aallarteqqippat tunisat nammineq assartoriaqassavavut, Imiina Hammond oqarpoq.