Wednesday, January 11, 2017 - 05:29

Ukiut tallimaannaat qaangiukkaangata inissiamik tigusisinnaanngorneq

Siunnersuutip suliffeqarneq aalajaannerulersinniarpaa
Assi.: Leiff Josefsen
Ukiut tallimat qaangiukkaangata allamik suliffeqalersinnaaneq maanna periarfissaalissaaq, sulisunullu inissiami najugaqaannarsinnaalluni

- Atorfimmut atatillugu inissiamik neqerooruteqanngilaq.

Sulisussarsiorluni allagarsiussat naqqani taama allaqqasoqakkajuppoq, atorfinnullu allanut inissiamik imaluunniit allaat illumik sulisussamut iluatsitsisumut neqerooruteqartoqartartoq.

Atuaruk: Sinerissami inissiat isaterneqartut

Inissiani nalinginnaasuni attartortakkanik utaqqisuniinneq sivisunerata saniatigut, sulisunut inissianut aaqqissuussaaneq suliffeqarnermut equngasitsilertarpoq, tamanna inatsisissatut siunnersuutip nutaap iluarsitinniassavaa.

Ukiut arfineq-marluk qaangiukkaangata tiguneqarsinnaasoq
Attartortoq atorfininnerminut atatillugu inissiamik pissarsisimasoq, maanna inissiaq nalinginnaasumik attartortutut ukiut tallimat qaangiukkaangata attartortunngorsinnaalissaaq. Ullumikkut tamanna ukiut arfineq-marlunnik killeqartinneqarpoq.

Tamanna inissianik attartortitsisarneq pillugu Inatsisartut peqqussutaata allanngortinneqarnera pillugu Inatsisartut inatsisaannut missingiummi tusarniaavigineqalersumi allaqqavoq.

Atuaruk: Containerit angerlarsimaffeqanngitsunut inisimmavigissavaat

- Siunnersuummi Inatsisartunit kissaatigineqarpoq suliffeqarnermi nuttarsinnaanerulersitsinis-saq, tassami sulisut sulisunut inissiami najugaqartut, inigisaminnik nalinginnaasumik inissia-tut attartortittakkatut tigusisarunik, allamik suliffeqalersinnaanissaat ajornannginnerulissasoq ilimanarmat, inatsisissatut siunnersuutip nassuiaataani allaqqavoq.

Ukiuni tallimani inissiamik attartugassamik utaqqineq
Pingaartumik kommunini aamma Namminersorlutik Oqartussani sulisut pisortat sulisunut inissiaataannut periarfissaqartuupput. Allat pisortat inissiaataannit neqeroorfigineqanngitsut pisillutik imaluunniit inissiamik attartortakkamik utaqqisunut ilannguttariaqassapput.

Utaqqisullu tassani amerlapput.

- A/S Inissiaatileqatigiiffik INI taamaalilluni paasissu-tissiivoq (november 2016), Qaqortumi nalinginnaasumik inissiamut attartortittakkamut utaq-qineq ukioq ataaseq inulaarlugu sivisussuseqartoq, Nuummi utaqqineq ukiut 5-it sinnilaarlugit sivisussuseqarpoq, Sisimiuni utaqqineq ukiut 2-it inulaarlugit sivisussuseqarpoq aammalu Ilulissani utaqqineq ukiut 4-it sinnerlugit sivisussuseqarluni, tamanna oqaatigineqarpoq.

Inatsisissatut siunnersuut upernaakkut ataatsimiinnermi suliarineqassaaq, saqqummiunneqartutullu akuerineqassappat, sulisussarsiorluni allagarsiussani una ukiut tallimat qaangiukkaangata atorunnaartassaaq: "Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni". 

Seneste nyheder / Nutaarsiassat kingulliit