Nerisassat
Ukiup igasui sapiiserlutik nutaalianik sassaalleertut
Tallimanngornerup unnukkua inuussutissanut ilinniarfimmi Inuilimi pissangartorfiungaatsiarpoq. Ilinniartoq ajugaasoq nuannaarnerup pianik qiavoq, ilinniartullu ajugaanngitsut aamma qiangajaavipput
Nuummi Katuap iggaviani igasunngorniaq Ivalu Sandgreen ajugaasuuvoq, Aggu Brobergilu Katuminngaanneersoq tulliuvoq. Hotel Hans Egedeminngaanneersorli Anders Olsen pingajuulluni.
Sapiiserluni nutaaliorneq
Nick F Rosbach Qaqortumi Lal'Laatip Cornerianinngaanneersoq ukiumi ingasunngorpoq. Tulliuvoq ingasoq namminersortoq Iluliarmiu Kunuk Grønvold, ukiorlu kingulleq ajugaasimasoq Nuummi Royal Greenlandip neriniartarfianinngaanneersoq Sune Bjerre pingajuattut inissippoq.
Dommeriuneq Benny Friis Danmarkiminngaanneersoq, akunnittarfiit neriniartarfiillu ilinniarfiit unammisuinik ilinniartitsisuusoq, ilaatigut oqaatigaa, nerisassioriaaseq sapiissuseqarluni nutaaliornertalik pitsaassusaa qaffasissimasoq. Pingaartumik ilinniartut aatsaat aallarteqqammiinnarlutik, tassa ilinniartut ukioq manna aallartittut, pitsaassusaasa qaffasinnerujussuat.
- Sapiittariaqarpoq, taanna oqarpoq.
Nerisassat
Ilinniartut nerisassiorlutik unamminerminni arferup neqaa, raajat, aspargesit qorsuit, rabarberit tikiusaallu atorneqarput. Kinguleqqanullu kigutaarnat, vanillestangit piskeflødilu atorneqarlutik.
Igasut eqalussuup nuliata paperuai, raajat mattallu siuleqqanut atorpaat. Nerisassatullu pingaarnernut ukallit aqissillu atorneqarlutik.
Akissarsiat agguaanneqareermata unamminermi peqataasut, ilinniarfiup ilinniartitsisui aningaasaliisimasullu ilinniarfiup neriniartarfiani kalaallit nerisassiaataanik sassaallerfigineqarput.
Dommerit
Thimothæus Petersen aamma Elisabeth H Jensen iggavimmi dommeriupput.