pilluarit

Ukiup frimærkia toqqarneqarpoq

Eqqumiitsuliortup Naja Abelsenip frimærki suliaraa

Frimærki eqqumiitsuliortumit Naja Abelsenimut suliarineqarpoq

Tele-Post-ip 2013-imi frimærkit saqqummersitaasa 24-t akornanni nunarsuatsinni tamarmi frimærkinik katersisartut nuannarinerpaasartik toqqarpaat.

Eqqumiitsuliortup Naja Abelsenip frimærki suliaraa. Tele-Post-imit siornatigut saqqummersinneqarsimasut frimærkit katillutik 16-it Najap assiliartalersugarai. Frimærki ’Uumasut nungutaanissaminnut ulorianartorsiortut’ juunip aqqarngani ukioq kingulleq saqqummiunneqarpoq. Israelimi allakkeriveqarfik peqatigalugu saqqummersitaavoq, siunertaasimavorlu uumasut nungutaanissaminnut ulorianartorsiortut maluginiarneqarnissaat.

Frimærki Augmented Reality teknologiimik atortuligaavoq. Taamaalilluni nannumik uumasumik videoliaq naatsunnguaq takuneqarsinnaanngussaaq 'Sepac App'-i aagaanni, taavalu tabletimut smartphonemulluunniit ikkullugu – frimærkilu scannerlugu.

Qulit aamma ajugaasut
Toqqaanermik unammisitsinermi pinnattaassanik pingaarnernik 10.000 kroninik pinnattuuvoq Philippe Kocielkowski, Belgiami Saint-George-sur-Meuse-meersoq.

Immikkut pinnatsinneqarput qulit, pinnattaaralugu 2013-imi ukiup mappea, taakkulu tassaapput Esa Kallio Sverige-meersoq, Gert Kragh Andreasen, Camilla Nissen Toftdal, Jørgen Rasmussen aamma Jørgen Vesth-Hansen Danmark-imeersut, Bezazel Ferhat Algeriameersoq, Pastorimi Massimo aamma Francesco Magnani Italiameersut, Tor Nygaard Norge-meersoq, kiisalu Uda Yanuhardi Indonesiameersoq.

’2013-imi Nunatsinni Ukiup Frimærkia’-nik toqqaasitsineq piffissami 1. december 2013-imiit 1. marts 2014-imut ingerlavoq. Post Greenland-ip atuagassiaatigut Greenland Collector-ikkut, stamps.gl-ikkut aammalu facebook.com/stamps.gl-ikkut taasineq ingerlanneqarpoq.

Powered by Labrador CMS