isumaqatigiinneq
Ukiuni pingasuni akissarsiat akileraarutaat nikisinnianngikkaat
Demokraatit aningaasaqarnermut oqaaseqartartuata isumaqatigiissuteqarnertik nuannaarutigaa, taassuma ilaatigut qulakkiissavaa maanna qinigaaffiusumi akissarsiat akileraarutaat qaffassannginnissaa
- Demokraatini aallaqqaataaniilli oqaatigaarput pisariillisaanerit sipaarnissarlu piumanerungipput akitsuutit qaffanneqarnerannut naleqqiullugu. Aamma oqarnikuuvugut, akissarsiat akileraarutaasa qaffannissaat pinavianngilluinnartoq, Tillie Martinussen tusagassiuutinut nalunaarummi oqarpoq.
Taassuma aningaasanut inatsit Siumut aamma Atassut peqatigalugit isumaqatigiissutigeqqammerpaa, qinigaaffimminni akissarsiat akileraarutaat qaffanneqannginnissaa pituttorfigilerlugu.
Isumaqatigiissut aamma nutaamik minnerusumillu akileraarusersuinissamik imaqarpoq.
Atuaruk: Aajuna akitsuusersuineq 'annikitsoq'
Pisortani sipaarniarneq
- Aamma isumaqatigiissutingaarput pisortat allaffissornerat millisarneqarlunilu pisariillisaavigineqassasoq. Tigussaasumik tamanna pissaaq, kontot inatsisitigut qilersungaanngitsut annikillisaanermut periutsimik taaneqartartoq atorlugu annikillisaanikkut ukioq mannamut aningaasanut inatsimmi aamma ukiunut missingersersuusiorfiusunut.
Partiit isumaqatigiissuteqartut isumaqatigiissutigaat peqqinnissaqarfik taamatullu kommuninut bloktilskudit attorneqassanngitsut. Tassa - kalerriutigineqareertutut - Namminersorlutik Oqartussani aamma pisortat sinnerini pimoorullugu sipaartoqassaaq.
Ilinniartitaaneq qajassuunneqartoq
Naalakkersuisoqarfinni tamani procentimik ataatsimik aappaagu sipaarniartoqassaaq ukiup tullianilu marlunnik. Taamaaliornikkut naalakkersuisooqatigiit 16 millionit koruuninik isertitaqassallutik naatsorsuutigaat.
Ilinniarmermut naalakkersuisoqarfik affaannarmik naalakkersuisoqarfinnut allanut sanilliullugu sipaaruteqassapput.
Atuaruk: Ilinniartitaaneq aamma peqqissuseq sipaarniarnermi eqqorneqannginnerpaassapput
- Demokraatini iluarisimaarparput isumaqatigiissuteqarnikkut qinigaaffiup sinnerata iluani ingerlaavartumik pisariillisaanissaq qularnaarneqarmat. Peqataanik nuannaarutigaarput qinigaatitatta sisamaasut akissarsianut akileraarutip qaffannnissaaralua aammaarlutik pinngitsoortimmassuk.
Isornartorsiorneqassasut
Isumaqatigiissut nutaaq Inuit Ataqatigiit nuannaarutigivallaanngilaat. Partiip politikerii ukiuni arlalinni Kalaallit Nunaanni aningaasarsiat annertussusaat naapertorlugu akileraartarnermut illersuisuupput.
Aningaasarsiat annertussusaat naapertorlugu akileraartarneq nunani amerlanerni takussaavoq, allatut oqaatigalugu imaappoq, aningaasarsiakkaanerutilluni annertunermik akileraartarneq.
Atuaruk: Aajuna akitsuusersuineq 'annikitsoq'