Ukiuni marlunni utaqqereerlutik: Nunatsinni suiaqatiminoortut katissinnaalerput

Kinguartitsinerit arlallit kingorna, ilaatigut aasaq folketingimut qinersisoqarnera pissutigalugu, kalaallit oqaluffimmi katinnissaminnut pilersaaruteqartut utaqqinerat taamaatippoq.

Akuersisut 108-t aammalu akerliusoqarani, aappariit suiaqatigiittut Folketingip oqaluffimmi palasilerlutik katissinnaanngornerat akueraa.

Sivisuumik piareersarneqartoq
Tamanna qallunaatut homovielsinik, kønsneutrale kirkevielsinik aamma regbuebryllupinik taaneqartarpoq, ilaatigut asanninnerit assigiinngitsut 2015-imi akuerineqartut ataqqiniarlugit. Taaguutini assersuutigalugu arnanik angutinillu aappaqartartut aamma pineqarput.

Inatsimmik allannguiniarneq 2014-imili suliarineqalerpoq.

Atuaruk: Suiaqatigiit oqaluffimmi katissinnaanngungajalerput

Inatsit siullermik Inatsisartuni akuerineqartoq, maannalu Folketingimi naammassillugu suliarineqartup, nuna tamakkerlugu arnaqatiminoortut, anguteqatiminoortut, arnanik aamma angutinik aappaqartartut peqatigiiffianni Nunatsinneersut, LGTB Qaamanerup nuannaarutigaa.

- Nunatsinni tamanna amerlasuunut nuannaarutaavoq, tassami inuiaqatigiit kristumiuugatta aamma LGBT-iusut inuit inuiaqatigiinni soorunami ilaammata, Ivalo Rosing oqarpoq, taanna peqatigiiffimmik ingerlatsisuuvoq.

Inuunerup killiffii
- Kristumiut upperisaat pingaartitaallu kulturikkut kinaassusitsinnut pingaarutilittut ilaavoq, uagutsinnullu immaqa kikkuunerlutaluunniit ilisimanninngikkallarattali kuisissimasunut aamma apersortissimasunut, maanna inuunermi killiffinni alloriarnermut tulliuttumut pingaarutilimmut, tassa oqaluffimmi katissinnaasunut ilanngussinnaagatta nuannerpoq.

Taassuma nuannaarutigaa, qinikkat inuiaqatigiillu tungaannit tapersersuisoqarsimanera, aammalu Kalaallit Nunaat 'nunarsuup ineriartorneranut' malinnaanera, tamatumalu tungaatigut annerusumik assigiimmik periarfissaqartitsiartornera.

Kalaallit Nunaata ilaqutariinnermut inatsisit tunngasut akisussaaffigilernikuunngilai. Taamaammat Folketingimi tamanna aalajangerneqarpoq.