Ukiuni 40-ni meeqqanik ikiuussimasut
Sara Lennert Sofie Mathiassenilu Dronningip nersornaasiuttagaanik tunineqarput
Meerarpassuit Sisimiut meeqqerivianniittarsimapput, meerarpassuillu taakku arnanit taakkuninnga sullinneqartuarsimallutik.
Meeqqanik sullissisut Sara Lennert aamma Sofie Mathiassen ukiuni 40-ni meeqqanik sullissisuusimapput.
Taakku sulisimanerat pillugu ullumikkut marlunngornermi Dronningip nersornaasiuttagaanik, Qeqqata Kommuniata borgmesterianit Hermann Berthelsenimit, tunineqarput. Nersornaasiinermi ilaqutaasut, ikinngusut suleqataallu najuutsinneqarput.
- Kommunitsinni meeqqatsinnut aalajaatsuunersi isumagiinninnersilu Qeqqata Kommuinia sinnerlugu qutsaviginiarpassi. Marluullusi aalajaatsuunissinnik meerarpassuit inuuneranni allanngueqataasimassasusi qularinngilara, nersornaasiinermi Hermann Berthelsen oqarpoq.
Sara Lennert 1976-imi juulip qaammataani barnehjælperitut naammassivoq, ukiorlu taanna novembarimi Sisimiuni meeqqerivimmi Aleqa-mi barnehjælperitut sulilerluni. Sara Maniitsuminngaaneerpoq.
Meeqqerivimmut nutaamut Naalumut Sara atorfinitsinneqarnissaminik 1986-imi qinnuteqarpoq, aammalu barnehjælperitut atorfinitsinneqarluni. 1995-imiilli Sara meeqqerivimmi perorsaasutut ingerlanikuuvoq, taamanikkut immikkut qinnuteqartoqartuaannarsimammat, taamaalilluni Sara barnehjælperitut misilittakaminik perorsaasutut atorfik ingerlassinnaallugu. Sara Naalu-mi ukiuni 31-ni atorfeqarnikuuvoq.
Ullumikkut meeqqanut ikiorti aappaa nalliuttorsiuterput tassaavoq Sofie Mathiassen, taanna 18-nik ukioqarluni meeraaqqerivik Nuka-mi ikiortitut sulinini aallartinnikuuvaa. Sofie 1979-imi barnehjælperitut ilinniakkaminik naammassinnippoq, aammalu piffissap ilaani Meeqqerivik Sisi-mi sulinikuuvoq kingusinnerusukkullu angerlarsimaffimmi paarsisalerluni.
1988-imi Sofie meeqqerivik Mikisoq-mi atorfinitsinneqarpoq. Meeqqerivik Mikisoq-mik atserneqarpoq, pisiniarfik Polar Mikisoq-mi init tiguneqarmata. Mikisoq meeqqanut 15-inut inissaqartitsisimavoq, inissaaleqilernerlul pissutigalugu meeqqerivik 2013-imi matunissaata tungaanut Sofie sulisimavoq. Mikisoq-mi meeqqat sulisullu tamaasa peqatigalugit Sofie Uiaq-mut, meeqqerivik akuleriisitsiffiusoq, meeqqanut 64-inut inissaqarluni 2013-imi maajip aallaqqaataani ammartumut nuuppoq.