Ukiuni 118-ini sermip iigartartup aakkiartornera misissorneqassaaq

Kalaallit Nunaanni sermip iigartartup annersaat, ukiuni 118-ini kingullerni immap qaffakkiartorneranut qanoq sunniuteqarsimatiginersoq GEUS-ip misissussavaa.

Ilulissat eqqaanni sermersuup iigartartup, ukiut tamaasa ilulianik millioninik tonsinik oqimaassuseqartunik Qeqertarsuup Tunuanut aniatitsisoq takusimagaanni, GEUS-imi aamma DTU-mi ilisimatuut assinganik eqqarsartoqareersimassaaq. Tassani imeq qanoq annertutigisoq imaanut pisarpa?

GEUS-ip aamma Danmarks Tekniske Universitetip ilisimatusarnissamut aningaasaliissutit 5,8 millionit koruunit atorlugit tamanna paasiniarniarpaat. Immap qaffakkiartornera Kalaallit Nunaanni sermip iigartartut annersaannit qanoq sunnerneqartarnersut, ilisimatuut suliassarissavaat.

Aningaasat Danmarks Frie Forsknings Fondimit tunniunneqarput.

Paasissutissat

William Colganip, GEUS-imi ilisimatuup ilisimatuussutsikkut suliniut ingerlatissavaa. GEUS-ip nittartagaani ima oqarpoq:

- Iluliarsuit aakkiartornerat aserortarnerallu nammineq pisarput, taamaattuaannarnikuullutillu. Taamaattumik piffissap ingerlanerani qanoq ineriartorsimanera paasiniarniarparput, sermip iigartartup immap qaffakkiartorneranut qanoq sunniuteqarsimanera.

Ilisimatuut sermimut iigartartumukarlutik nutaanik uuttuiniarput, kisianni aamma paasissutissat 1900-meersut misissorsimavaat.

Paasissutissat nutaat aamma pisoqqat tamarmik katersorneqareerpata, piffissap ingerlaneranit paasissutissamik takussutissiortoqassaaq, piffissap ingerlanerani sermeq iigartartoq immap qaffakkiartorneranut sunniuteqarsimanersoq takussutissiaralugu.

Uani ataani William Colganip ilisimatuussutsikkut misissuineq oqaluttuarigaat tusarnaarsinnaavat.

Powered by Labrador CMS