Angallanneq
Ukiumi mittarfitsialattut toqqarneqartut
Ukiumi Mittarfitsialattut Mittarfeqarfiillu pitsaassutsimut nersornaasiuttagaanik mittarfiit marluk nersornaaserneqarput
Qanittukkut Mittarfeqarfinni pisortat ukiumoortumik seminareqarneranni pissangasoqarlunilu nuannattoqarpoq, Mittarfeqarfiit nersornaasiuttagai tunniunneqarmata.
Nunami mittarfinnit 13-init ukiumi mittarfitsialattut toqqarneqarpoq Aasiaat mittarfiat.
Mittarfeqarfiit pisortaata Jens Lauridsenip nersornaat mittarfiup pisortaanut Bo Qvistimut tunniuppaa.
Aqutsineq sammineqarpoq
Ukioq manna pingaartinneqarsimavoq nersornaat mittarfimmut, ukiup ataatsip ingerlanerani nikeriarnerpaasimasumut, tunniunneqassasoq, Mittarfeqarfiit nalunaarpoq.
– Pingaartissimavara aqutsisutut ineriartortitsinermik ingerlatsinitsinnit pissarsiarisimasat atorluarsimanerat, tamakkualu ulluinnarni atugaalersimanissaat. Aasianni Bo taamaasiorsinnaasimavoq, ulluinnarnilu ajornartorsiutinut takkuttunut aaqqiissutaasinnaasunik nassaarsiullaqqissuusimalluni.
Sisimiut nersornaaserneqarpoq
Pisortap aamma Aasianni missingersuutinik ingerlatsineq, aammalu ´sulisut nuannaartut iluarisimaarinnittullu´ nersualaarpai.
Ukiumi pitsaassutsimut nersornaat Sisimiut Mittarfiannut tunniunneqarpoq, Bo-mullu atilimmut allamut, mittarfiup pisortaanut Bo Olsenimut nersornaat tunniunneqarpoq.
Pitsaassutsimut pisortartaap Per Hangaardip nersornaat tunniuppaa, pingaartumillu erseqqissaatigineqarput mittarfiup sulinermini piffissarititanik, pilerssaarutinik suliassallu kingusinnerpaaffigisassaannik malinnittarsimanera.
Ikiuunnissinnut qujanaq
Pitsaassutsimut pisortaasimasoq Troels Arnkjær mittarfiit pisortaannut Ukiumi Ingerlatsilluarnerpaatut nersornaammik tunineqarpoq.
Nersornaat kingulleq, ukioq manna immikkut ittumik tunniunneqartoq, tassaavoq Arctic Winter Gameseqarnerata nalaani Kangerlussuarmi sulilluarsimasumut qujassut.
Niels Grosenip nersornaat taanna Mittarfiup pisortaanut Rita Müllerimut, Akunnittarfiup pisortaanut Morten Nielsenimut aamma Hotel Inspektør Jesper Nielsenimut tunniuppaa. Ilanngullugu Nuup Mitttarfia unammiuaarnerit nalaanni sulilluarsimanerujussuamut qutsavigaa.