Qaanaaq
Ukioq manna ukiuni 20-ni ajornersaavoq
Qaanaami suliassanik naammattorsuarnik peqaraluarpoq, illut ajungaarmata taama ajortigisunik allani nassaassaqarunanngilaq, taama oqarpoq Kim Fritze, sanasutut suliffiutilik ukiuni 20-ngajanni Qaanaami misilittagalik
Kim Fritze sanasunik Qaanaarmiunik qulinik sulisoqarpoq, kisianni suliassaqanngillat.
– Ukioq manna ukiuni 20-ni aatsaat taama ajortigisumik misigisaqarpunga, oqarpoq. Ilaqutariit qulit eqqugaapput taakkulu amerlapput Qaanaap 656-inik inoqarnera eqqarsaatigissagaanni. Sulisukka aperiuarput suliassaqarpa. Assut ilungersunartorsiorput uangalu qanoq iliuusissaqanngilanga, Kim Fritze, Tamanut Avannaanimut oqarpoq.
Sanasuni assut isumakuluutigai.
– Naluaat sulerissanerlutik, qaleralinniarsinnaanngillat tunisisinnaannatillu, taamaammat assut ilungersunartorsiorput, qeqqiinnaqqalerput. Pissutsit maannakkutut itsillugit aasaaneraniluunniit suliassaqanngilaq, aasaanerani 15-it 20-llu akornanni amerlatigisut sulisaraluarput, kisianni aasap ingerlanerani ataaseq imaluunniit marluk sulisinnaassagunarput, tassa, Kim Fritze oqarpoq.
Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi atuaruk. Oqaluttuap sinnera tassani atuaruk. Aviisi akeqanngitsumik uani pissarsiarisinnaavat: