Ukioq manna kina Koda-mit nersornaatisissava?

Koda-p nersornaasiuttagaa ukiuni arlalinni pisimanani Nuummi tunniunneqassaaq. Tamanna pissaaq Akisuaneq Festivalimi, tassani ukioq manna nersornaatit, piukkunnaatilimmut ataqqinaataasumillu nersornaat tunniunneqassallutik.
Nipilersortartut soorliit 2012-imi nunatsinni pitsaanerpaamik saqqummersitaqarsimanersut nipilersortartullu sorliit siorna nipilersornermik nutaaliortitsisumik sanasimanersut nalilerneqartussanngorpoq.
Koda-p nersornaasiuttagaanut ukioq manna tunniunneqartussatut piukkunneqartut tassaapput Dida, Jenseeraq aamma Qeqquaq. Inassutigineqarluni pingasuni ajugaasoq 25.000 koruuninnassaaq.
Piukkunnaatilittut piukkunneqartut tassaapput: Small Time Giants, Uyarakq (aqqalu Engell) aamma qatanngutigiit Nukannguaq aamma Zakorat Zeeb, nipilersortartoqatigiinni "Tulleriit" saqqummersitaanni erinniortuusimasut.
Aamma inuit pingasut ataqqinaammik nersornaasigassatut piukkunneqarput. Tassaapput Peter O. Petersen, ukiuni qulikkaani arlalinni kalaallisut nammineq sanaaminik nipilersortartuusimasoq, aammalu Angu Clasen, Inneruulaneersoq Inunnguaq Petrussenilu, taanna inuusukkaluarluni nipilersortartuunermi saniatigut kalaallit nipilersugaaannik siammarsaaniarluni annertuumik suliniuteqarsimavoq.
Nersornaat Koda Greenland Award tunniunneqassaaq oktobarip 6-anni kulturip illorsuani Katuami.