takorluukkanik seminari

Ukioq 2025-mut ilinniagaqartut takorluugaat

Kalaallit Nunata siunissaa pillugu Folketingimi takorluukkanik seminareqarnermi, ilinniagaqartut inuussutissarsiutinut isumassarsiaminnik saqqummiussiffianni, takornariaqarnermut isumassarsiat isumassarsiatsialaanerpaatut toqqarneqarput

Visionseminar til studerende
Kalaallit Danmarkimi nunatsinnilu ilinniagaqartorpassuit takorluukkanik seminareqarnermi peqataapput

Aallaqqaataaniilli unamminermi pissangarpasissoqarpoq kalaallit ilinniagaqartut, inuussutissarsiortuneersut universitetimeersullu peqatigalugit, arfininngormat Københavnimi Folketingets Fællessaliani naapimmata.

Ilinniagaqartut 45-t assigiinngitsorujussuarnik ilinniagallit Kalaallit Nunaanni 2025-mi inuussutissarsiornikkut periarfissatut takorluukkaminnik saqqummiussissapput. Pitsaanerpaanik isumassarsiallit ajugaasutut toqqarneqassapput.

Avalak, ILI ILI aamma IA Folketingimi takorluukkanik seminareqartitsinissamik suliniuteqartuupput, taannalu ukiortaami oqalugiarnermi aallartinneqarpoq.

´2025 tikingajalerparput´, Inuit Ataqatigiinnit folketingimut ilaasortaq Aaja Chemnitz Larsen aallartippoq. Taassuma pingaartippaa isumaginninnerup ilinniagaqartitsinerullu iluini pitsanngorsaasoqarnissaa, aammalu siunissami nunassittarnerup pissusiata oqaluuserineqarnerunissaa.

Ukiortaami oqalugiarnini naggaserlugu eqqaasitsissutigaa ´inuusuttunik upperinnittoq siunissamik upperinnittuuvoq´. Taavalu isumassarsiorneq aallartinneqarpoq.

Ajornartorsiutit aaqqiissutissarsiorlugit

Ilinniagaqartut nunatsinni ajornartorsiutit ilaannut aaqqiissutissarsiussapput. Grønlandsværelsimiipput gruppi ataaseq, siunissami Kalaallit Nunaata siuariartornissaanut aningaasaliissuteqarfigisassanut siunnersuusiortussat.

Færøværelsimiittut sammisassaraat: Kalaallit Nunaata avammut tuniniaanerani aalisarneq pingaarnersaavoq. Gruppip Fællessalip saniani ataatsimiittarfimmiittup isummersorfigisassarai Kalaallit Nunaanni takornariaqarnikkut misigisaqartitsinikkullu aningaasarsiorneq, gruppillu sisamaat naggataallu Fællessalimiippoq sammillugit nutarterineq, aallartitsineq avammullu tuniniaanermi periarfissat nutaat.

Immikkut ilisimasallit peqatigalugit

Ilinnigaqartut isumassarsiornissaannut aamma inuit sammisanut ilisimasallit qaaqquneqarsimapput, tamakkualu gruppini siunnersuisuussapput. Ilaatigut Royal Greenlandip pisortaa Mikael Thinghuus aamma Anders Solbakken, Visit Greenlandimeersoq.

– Ilinniagaqatit, uanga sammisannit allaanerusunik sammisallit isumaat tusarlugit ilikkarnarsimaqaaq, Bjørk Lange Kristensen, inuussutissarsiutini aningaasarsiornermik ilinniagaqartoq oqarpoq.

Taanna aalisarnermutd gruppimi peqataavoq, taamatuttaaq Binia Andreassen, bygningskonstruktøritut ilinniagaqartoq:

– Isumaqatigiippugut aalisarnermik isiginninneq allanngortinneqassasoq, taamaasilluni aalisartut inuussutissarsiutertik tulluusimaarutigileqqissammassuk.

Ualingaatsiaraa isumassarsiat tamarmik dommerinut saqqummiunneqardput, taakkualu nassaarsiullaqqinneq, nutaamik eqqarsarneq immikkuullarissuunerlu aallaavigalugit naliliissapput.

– Isumaqarpunga ilinniagaqatit nunamit tamarmeersut naapillugit nalissaqanngitsoq. Taavalu nuanneqaaq paasiniarlugu Kalaallit Nunaannut qanoq iliuuseqarsinnaanersugut. Tamattami maaniippugut qanoq iliuuseqarusukatta, tusagassiortunngorniartoq Mia Chemnitz oqarpoq, taassumalu suliniut ajugaassutaasoq saqqummiuppaa.

Takornariat amerlanerusut

Ajugaasut tassaapput takornariaqarnermik samminnittut. Piviusunik siunnersuuteqarput Arctic Circle Trail, Kangerlussuup Sisimiullu akornanni aqqusineq 166 kilometerinik takissusilik, qanoq isillunni takornarianik amerlanerujussuarnik ussatsitsisinnaanersoq.

Takornriartitsisartut pioreersut atussavagut oqaluttuallaqqinnerussaagullu sunik peqarnersugut tunisassiavullu atuisartunut naleqqussarlugit. Neqeroorutit ilagisinnaavaat: Qaagitsi ullunilu pingasuni kalaaliusa, Mia Chemnitz tusarnaartunut oqarpoq.

Aappaagu ilinniagaqartunut inuussutissarsiortunullu takorluukkanik seminari Kalaallit Nunaanni ingerlanneqassaaq.

Powered by Labrador CMS