Grønlandsbanken
Ujartuineq: Politikkikkut sapiissuseq
Kalaallit Nunaat aningaasaqarnikkut nammineq nammataqassaguni aamma inuiaqatigiinni ineriartornermik nukittuumik ingerlaqqissaguni, Grønlandsbankenip aaqqissuusseqqinnissamut politikkikkut sapiissusermik ujartuivoq.
Inuiaqatigiit aningaasaqarnerannik misissuinermi aningaaseriviup ukiumut naatsorsuutinik marlunngornermi saqqummiussineranut atatillugu saqqummiunneqartumi, aningaaseriviup politikerinut qinnutigaa.
Aningaaseriviup unammilligassat aaqqinnissaanut ajornakuusoortut taakkartorpai, aammalu akunnattoorfiusut arlallit pingaarnersiorlugit:
- Illuani kalaallinik suliffissaaleqisoqarpoq, illuanilu atorfinnik inuttaqanngitsoqarpoq tikisitanillu sulisoqarluni
- Illuani tulaassuinissamut pisussaaffik amerlanernik suliffissaqartitsivoq, illuanilu aalisarnermi ingerlatseqatigiiffinnut aningaasartuuteqarnikkut unammilleqatigiinnermik annikillisaalluni
- Illuani ilinniarnitsinnut aningaasarpassuit atortarpagut, kisianni illuanilu ilinniagaqanngitsoortorpassuusarput, ikippallaallu qaffasissumik ilinniartarput
- Illuani tapiissutinik tunniussisarpugut, illuanilu aningaasaqarnikkut akisussaassusermik peersisarpugut
- Illuani aatsitassarsioqatigiiffiit aggersarusuppagut, kisianni illuanik nunarput aatsitassanit iluanaaruteqarluarnissaa qulakkeerniarparput, immaqa aningaasaliisartut naammattumik iluanaarnissaanut periarfissinneqanngitsoortarlutik
Aaqqissuusseqqinneq sisamat pisariaqarput
Aningaaserivik aaqqissuusseqqinnissanik sisamanik siunnersuuteqarpoq, taakku pingaaruteqarluinnarput.
Suliffeqarnermut ilinniarnermullu aaqqissuusseqqinneq: Suliffittaarnissaq aningaasaqarnikkut pilerinarninngortinneqartariaqarpoq, suliffittaarniarluni illoqarfimmut allamut nuunneq aamma sulisussaaleqiffiusuni tikisitanik sulisoqarnissamut oqinnerusumik isummernissaq aamma ilinniarsimassuseq qaffallugu.
Ineqarnermut aamma isumaginninnermut aaqqissuusseqqinneq: Ineqarnermut akiliutinik akinut tulluartunik pilersitsisoqassaaq, saniatigullu isertitakinnerusullu assersuutigalugu ineqarnermut tapiissutitigut aamma akissarsiatigut ilanngaatitigut taartisialiisoqartariaqarpoq, inissianut nammineq pigisanut attartortittakkanullu namminersortut aningaasaliinissaannut pilerinarninngortitsilluni.
Aamma atuaruk: Grønlandsbanken aatsaat taama taarsigassarsisitsigaaq
Grønlandsbankenimi pisortap Martin Kviesgaardip Naalakkersuisut aaqqissuusseqqinnissanik kissaateqarnerat nersualaarusuppaa.
- Aningaasaqarnikkut siuariartoqarnerani aaqqissuusseqqinnissamut maanna piffissaalluarpoq, Martin Kviesgaard Sermitsiaq.AG-mut oqarpoq.