unammisitsineq
Ujarassiornermik soqutigisallit ujarassiorlutillu amerlasuunik aningaasannanniupput
Nuna tamakkerlugu ujarassiornermik soqutigisalinnut tamanut unammisitsineq – Ujarassiorit ukiut 29-issaannik ingerlanneqareerpoq, Kalaallit Nunaanni najugallit unammisitsinermut peqataanissaat kajumissaarutigineqarpoq.
Ujarassiornermut peqataaniaraanni paasissutissanik nittartakkamut imaluunniit allakkerivimmut aallernissaq kajumissaarutigineqarpoq.
Aningaasaliisut sisamat
Aatsitassanut Naalakkersuisoqarfiup unammisitsineq aaqqissuuppaa, aningaasaliisullu sisamat aningaasanik tapiisimasut ilisimatitsissutigaat: Grønlandsbanken, Alba Mineral Resources, (taakku marluullutik 40.000 koruuninik) Hudson Resources Greenland aamma North American Nickel (marluullutik 10.000 koruuninik).
Ajugaasup pinnatassaat akileraarutitaqanngitsut 55.000 koruuniupput, ujaqqallu nassiussat 1. oktobarip aallaqqaataatinnagu tiguneqareersimassapput.
Siorna unammisitsinermi Bendt Josefsen Kapisilinneersoq ajugaavoq.
Kanngussak, sølvi aamma kobolt
- Bendt Josefsen-ip ajugaasutut toqqarneqarneranut peqqutigaa ujarak gnejs-eq sulfid-italik Kapisillit kujataanni nassaarisimasani. Ujarak taanna kanngussassamik akoqarluarpoq, akugalugit kanngussak 3,17 %, siilvi ujaqqamut tonsimut 10,1 gram kiisalu kobolt tonsimut 814 gram. Nassaami kanngussap koboltillu ataatsimut akuunerat soqutiginaateqarpoq, taamatullu saffiugassat taakku akooqatigiinnerat Nuup eqqaata ujaraani pisoqarsuusuni piffissami Arkæikum-imeersuni naliginnaanngilaq. Nunap sannaani nutaajunerusuni soorlu Afrikap qiterpasissuani kanngussaqarfimmi kanngussak koboltilu ataatsimut nassaassaapput, Aatsitassanut Naalakkersuisoqarfik unammisitsinerup nittartagaani ilisimatitsivoq.