aatsitassat
Ujaqqat 1 million koruuninik nalillit arsaarinnissutigineqartut
Ujaqqat nunatsinneersut 569 kilomik oqimaassusillit avammut nassiunneqarsinnaanerinut akuersissummik piginagu Danmarkimut nassiunneqariaraluarput. Taamaammat nassiussat arsaarinnissutigineqarput.
Ujaqqat millionip koruunit angungajallugu minnerpaamik naleqarput, Aatsitassanut Naalakkersuisoqarfik tusagassiuutinut naluaarummi paasissutissiivoq.
Unioqqutitsilluni katersat
Unioqqutitsilluni ujaqqanik katersisoqarsimaneranik innuttaasunit saaffiginnussuteqarneq taamatullu Ilanngaaserisuniillu saaffiginnussuteqarnerup kingorna oktobarip qaammataaniit suliaq ingerlapallassimavoq.
Ujaqqat pineqartut tassaapput kryolit, sodalitk, tugtupit, ussingit ujaqqallu katersorneqartartut assigiinngitsut annikitsut.
Naalakkersuisoqarfiup ulloq 9. november aalajangerpoq, ujaqqat avammut nassiunneqarnissaannut akuersissutitaqannginneri pissutigalugu, arsaarinnissutigineqassasut. Ujaqqat Danmarkimi innuttaasumut tunniunneqartussaasimangaluarput.
Aningaasat nunap karsianut
Ujaqqallu 569 kilomik oqimassusillit massakkut tuniniarneqassapput aningaasallu nunap karsianut tutsinneqassallutik.
- Aatsitassanik nunatsinneersunit iluaquteqarnerup, tunisinerup avammullu nioqquteqarnerup inatsisit naapertorlugit pinissaa pingaaruteqarpoq. Tamanna nunatsinni aatsitassarsiornermik ineriartortitsiuarnissatta qiteraa. Ujaqqanik nunatsinneersunik inatsisit unioqqutillugit avammut annissinermik ilisimasaqaraanni pasitsaassaqaraanniluunniit aatsitassanut oqartussaasunut attaveqartoqartarnissaa kaammattuutigaara, politikkikkut akisussaaneq, Múte B. Egede oqarpoq.
Maleruaqqusat
Nunaqavissut ujaqqanik katillugit 25.000 kr-inik nalitunerusunik annissinissamik (avammut nioqquteqarnissamik) kissaateqartillugit, taamatullu avammut annissineq niuernermut atatillugu pippat, avammut nassiussisinnaanermut akuersissummik peqarnissaq piumasaqaataavoq, naalakkersuisoqarfik paasissutissiivoq.