Ujaqqanik katersisartoq 55.000 koruuninnattoq

Petra Bidstrup Kullorsuarmeersoq 55.00 koruuninik akileraarutitaqanngitsunik pisuujuninngorpoq.

Tassami ukiormanna Ujarassiorimmi unammisitsinermi akissarsiat annersaannik, Aatsitassanut Aqutsisoqarfimmi aaqqissuunneqartumi ajugaaqqammerpoq.

Zinki
Nassaava tassaavoq ujarak aatsitassanik sulfidinik sananeqaatilik Upernaviup avannaani Kullorsuup nunaqarfiata killingani nassaarisimasaa.

Ujaqqamik misissuinerit paasinarsisippaat ujarak saffiugassamik zinkimik 1,1 procentimik akoqartoq. Tamanna nutaamik paasissutissiivoq Kullorsuup eqaaqqaani zink-imik akulinnik aatsitassaqarsinnaaneranut.

Kitaata avannarpasissuani zinkimik akulinnik aatsitassaqarsinnaanera Namminersorlutik Oqartussanit GEUS-imiillu ataatsimut ingerlassatut misissorneqarpoq. Tamamma ukioq manna aasaanerani aallartippoq aappaagulu nangissalluni.

Ajugaasup aappaa
Peter Filemonsen Sisimiuneersoq akileraarutitaqanngitsunik 25.000 koruuninik akissarsitinneqarpoq. Peter Filemonsenip nassaava tassaavoq ujarak sulfidinik aatsitassartalik nikkelimik 0,2 procentimik aamma koboltimik saffiugassinillu platinimik assigisaanillu aamma akoqartoq.

Ujarak taanna Sisimiut eqqaani nassaarineqarpoq, nassaallu takutippaa sumiiffimmi tassani eqqaanilu aatsitassanik taamak ittunik nassaassaqarsinnaasoq.

Pingajuattut ajugaasut marluk
Ukioq manna ajugaasut pingajuattut toqqarneqartut marluupput, taakku immikkut 10.000 koruuninik akileraarutitaqanngitsunik pissarsipput.

Ajugaasut pingajuattut inissittup aapparaa Jonathan Davidsen, Qeqertarsuatsiaaniit. Ujarak akissarsissutaa tassaavoq amazonit qorsummik qalipaatilik, pinnersaasiassatut atorneqarsinnaasoq.

Ajugaasup pingajuata aappaa tassaavoq Enok Skade, Ukkusissat. Ujaqqat akissarsissutaasut aligormik sananeqaateqartut platinimik tonsimut 0,2 gramimik aamma palladium tonsimut 0,04 gramimik akoqarput.

Ajugaasut sisamaat sisamaasut
Taakku saniatigut sisamaannut sisamanik 5.000 koruuninik akileraaruteqanngitsunik agguaasoqarpoq.

Kristian Isaksen, Alluitsup paa. Ujarak nassaava qaarsumiit peerneqarluni misissugassanngortinneqartoq tonsimut 0,2 gramimik kuultimik akoqarpoq. Nassaarfiuvoq Nanortaliup avannaani qeqertaq Ammalortoq.

Godmann Filemonsen, Sisimiut. Ujarak Kangerlussuarmi Qatsissuarsummi nassaarineqartoq kanngussamik tonsimullu palladiumimik akoqarpoq.

Qaerngâq Nielsen, Savissivik. Savimminissaq sulfid-itaqarluartoq Savissiviup eqqaaneersoq savimminermik kanngussammillu akoqartoq.

Iver Lyberth, Maniitsoq. Nassaarineqartoq ujaraavoq savimminissamik magnetitimik akoqarluartoq savimminermik 50 procenti sinnerlugu akoqartoq. Ujarak Isortumi Maniitsup kangiani nassaarineqarpoq.

Aningaasaliisut
Grønlandsbankip inuusutissarsiornermut aningaasaateqarfia aamma suiliffeqarfiit aatsitassarsiornermik suliaqartut arlallit.

Aamma atuaruk: Aajuku Ujarassiorit 2014-imi ajugaasut