Ujarassiorit

Ujaqqamik 55.000 koruuninik nalilimmik nassaarsinnaavit?

Aatsitassanik ujarlerneq Ujarassiorit 25-issaa ingerlannaleqalerpat. Nassaarluarnerpaa akileraarusserneqartussaanngitsunik 55.000 koruuninik pissarsiassaqarpoq

Ujarassiorit ukiut 25-issaat maanna ingerlanneqalerpoq.

Ukiup ingerlanerani ujarappassuit alutornartut nassaarineqartarput. Ujaqqalli ilaat aningaasarpassuarni naleqarsinnaapput allaallu aatsitassarsiornermut aallarniutaasinnaallutik.

Ujarassiorit taama naatsumik oqaatigineqarsinnaavoq maannalu aallartippoq. Soqutiginnittut misissugassanik nassiusisinnaapput.

- Sunngiffimmi ujarassiortatut aamma Kalaallit Nunaanni najugaqavissutut allatsissimasut peqataasinnaapput, Inuussutissarsiornermut, Aatsitassanut Suliffeqarnermullu Naalakkersuisoqarfik Ujarassiorimik nakkutiginnittoq nalunaarpoq.

Ujarak ajugaassutaasoq 55.000 koruuninik akileraaruserneqartussaanngitsunik akissarsiartaqarpoq pinnatassanit katillugit 120.000 koruuniusunit.

Misissugassat kingusinnerpaamik oktoberip aallaqqaatani tiguneqareersimassapput ullorlu taanna kingoqqullugu tiguneqartut aappaagu Ujagassiorimi peqataatinneqassapput.

Powered by Labrador CMS