ujakkaarneq
Ujakkaartartup VM-eqataanissani naatsorsuutigaa
23-nik ukiulik ujakkaartartoq Karl-Peter Kristensen nunarsuarmi ujakkaarnermi pissartanngorniunnissamut anngunniuteqataaqqammerpoq
Ujakkaarnermi ukioq unammisaqattaarfiusoq Karl-Peter Kristensenimut arfininngormat aallartippoq.
Nunarsuarmi pissartanngorniuteqataanissani anguniarlugu aasaq tamaat sungiusarpoq. Sverigemi illoqarfimmi Falunimi aappaagu februaarimi VM-ertoqassaaq.
Karl-Peter Kristensen kilometerini qulini qangatoornermi Finlandimi ingerlanneqartumi 257-ni unammisuni 189-itut inissippoq.
Kilometerit qulit minutsini 26-ni sekundinilu 56-ni atorpai. Ajugaasumit minutsit sisamaat avillugu arriinnerulluni apuuppoq.
- Ukioq kingullermit siuariarnerusimanera malugisinnaalereerpara. Maani ukioq kingulleq 175-nik FIS-pointinnappunga, arfininngormat 135-nik FIS-pointinnallunga, Karl-Peter Kristensen oqarpoq.
FIS-pointinnannerit sapinngisamik amerlavallaartinneqarneq ajorput, uanilu ukiumi unammiffiusumi Karl-Peter Kristensenip FIS-pointit 120-t ataanniarlugit anguniagaqarpoq.
Unamminerit aallartinnerat iluarisimaarpaa.
- Nunarsuarmi pissartanngorniunnissamut anngunnissamut periarfissagissaarpunga. Qularinngilara unamminissani tulliuttuni pitsaanerusumik angusaqarnissara, Elite Sport Greenlandimit tapersersorneqartoq oqarpoq.
Tulliani Santa Caterina di Valfurvami Italiami qaammat naappat unammeqataassaaq. Tassanngaanni Østrigimut unammiartussaaq.