Monday, March 6, 2017 - 09:26

Ujakkaartartoq unitsitsivoq

Ujakkaartartoq 26-nik ukiulik Karl-Peter Kristensen ujakkaartartunnaarpoq
Assi.: Privat
Karl-Peter Kristensenip ajoqusersimanini pillugu ujakkaartarnini unitsippaa

Ujakkaartartoq 26-nik ukiulik Karl-Peter Kristensen aasiammiu sivisuumik eqqarsaatigeereerlugu ujakkaartartunnaarpoq.

2015-ip naajartulernerani ajoqusersimanini patsisaasoq, Sermitsiaq.AG-mut paasissutissiaraa.

Ukioq kingulleq nissumi siffissamilu saamerliit anniaatigalugit peqataarpianngitsoorpoq.

Atuaruk: Sisoraatinik oqilaniuttartoq ajoquserami sæsonip sinnerani peqataasinnaajunnaarpoq

Unammillernarsimavoq

- Qaammatit kingulliit unammillernarsimaqaat piffissallu ilaani ajoqusernerma qaangernissaa ilimagisarsimangaluarlugu. Aseruuttooqqaneralu utikajaanginnarsimavoq assullu anniartitsisarluni, Karl-Peter Kristensen, Norgemi Tromsømi najugalik oqarpoq.

Ataartaleqqinnissani, unammeqataasaleqqinnissani sakkortuumillu sungiusartarnissani kissaatigisimangaluarpaa.

- Sapaatip akunngeranut 28-30 tiimit sungiusartarnissara timinnut artukkiiginnassasoq ilimagaara. Imaluunniit qaamammut 85 tiimit, ukiumulluunniit 750-800 tiimit. Pitsanngoriartussaguma sungiusarninni aamma takussutissaqartariaqarpoq, isumaqarpungalu timima saperaa. Tiimerpassuit sungiusartarlunga misilittareernikuuara, qanorli sakkortutigisinnaanera nalunngilara, Karl-Peter Kristensen erseqqissaavoq.

Aalajangerneq artornartoq

Ujakkaartarnermi unitsinnissaa artorsaatigisimavaa.

- Aalajangerneq artornarpoq. Elite-nut peqataassagaanni iluamillu sungiusarsinnaanani ilungersunarsimasaqaaq, ulluinnannut allannguisimaqaaq. Taamaammat ujakkaartarnera unitsiinnarukku pitsaanerutissimavara.

- Elite Sport Greenlandimut 2009-mili tapersersorterisimasara qujassuteqarfigerusuppara. Taakkoqanngippammi angusarisimasakka angusimanavianngikkaluarpakka. Inuusuttunut 2011-mi VM, U-23 VM 2012-13-14-mi kiisalu VM 2013-mi 15-milu misigisimasakka puiornavianngilakka.

- Elite-tut ingerlatsininni pissarsiaqarsimaqaanga. Ilaatigut kinaassusera ilusilersorsimavaa qujavungalu. Qularinngilara misigisimasakka arlaanni atorfittaaruma iluaqutigiumaarlugit, Karl-Peter Kristensen oqarpoq.

Atuaruk: Video takuuk: Kunngissap Karl-Peter aamma VM pulaarpai

Seneste nyheder / Nutaarsiassat kingulliit