Ujakkaarluni DM
Ujakkaartartoq inuusuttoq piukkunnaatilittut toqqarneqartoq
Sisimiuneersoq ujakkaartartoq Noah Mikael Noahsen DM-ertoqarnerani ukioq manna piukkunnaatilittut toqqarneqarpoq
19-inik ukiulik Noah Mikael Noahsen, SSP Sisimiuneersoq ujakkaarluni Danmarkimi pissartanngorniunnermi Norgemi ingerlanneqartumi 'Årets Ungdomstalent'-itut toqqarneqarpoq, tassa inuusuttuni piukkunnaatilittut.
Noah Mikael Noahsen pissartanngorniunnermi angusarissaarpoq, tassami sisamanik kuultsinnappoq ataatsimillu sølvinnalluni.
Atuaruk: Ujakkaartartut angusarissaarluartut
Siuariarneq annertooq
- SSP ujakkaartartunit Noah Mikael Noahsen tulluusimaarutigalugulu nuannaarutigaarput. Ujakkaartartutut pitsanngorniarluni sungiusartarnera malinnaaffiginikuuarput, oqarsinnaavugullu sungiusarnini paarilluarlugu, ingammik ukiuni kingullerni siuariartoq, Sisimiuni ujakkaartartut timersoqatigiiffiat tusagassiuutinut nalunaarummi allappoq.
Akissarsititsissutaasoq Peter Wulffs Mindefondianit tunniunneqarpoq.
Ujakkaarluni DM-ertoqarnerani SSP 18-inik kuultinnappoq, sølvit 16-it aamma bronzit tallimat.