Ujakkaarnermi DM
Ujakkaarnermi DM-ernermi kalaallit angusarissaartut
Ujakkaarluni danmarkimi pissartanngorniunneq sapaatiummat aallartinneqarpoq. Karl-Peter Kristensen Aasiaanneersoq aamma Frederik Petersen Ilulissaneersoq Nunarput sinnerlugu unammeqataapput
Karl-Peter Kristensen ujakkaarluni danmarkimi pissartanngorniunnermi sprintimi unammeqataanermini sølvinnappoq. DM Norgemi illoqarfimmi Gaustablikkimi ingerlanneqarpoq. Sprintimi B-finalimi Frederik Petersen ajugaavoq.
- Finalertuni tamani kisima klassiskeruteqarlunga ingerlaarpunga qummukajaami angunissaanut periarfissaqarnerujumallunga. Kisianni ammukajaami klassiskerutit sukuutserutiniit pujaannerummata qummut siulliusup qanillinera annikippallaartoorpoq taamaalillunga angunngittoorpara. Kisianni angusara naammagisimaarpara, Karl-Peter Kristensen allappoq.
Frederik Petersenimi B-finalimi ajugaanini aamma naammagisimaarpaa.
- Naatsunut inissinnikka ajunngikkaluarput kisianni takisuunut naatsunullu tamatta pitsaaneruffeqarluta, Frederik Petersen oqaluttuarpoq.
15 kilometerernermi fristil
Ujakkaarluni DM-erneq sapaatiummat aallartinneqarpoq. 15 kilometerimi fristilerluni unammisitsineq siulliullugu unammissutigineqarluni. Karl-Peter Kristensen bronzennappoq, Frederik Petersen tallimaattut inissilluni.
- Sungiusangaatsiarnikuugama suli timera qasoqqakujuppoq. Massakkumiillu VM-ip tungaanut sungiusarnera appartissuara VM-ip februaarip 18-ani aallartippat pitsaanerpaaffissanniinnissara anguniarlugu, Karl-Peter Kristensen oqarpoq.
Ujakkaartartut marlunngorpat qasuersaartinneqarallassapput. Skithlon pingasunngorpat unammissutigineqassaaq.